GITAKDANG susihon sa Bansalan Police Office ang mga junk shops sa ilang lugar human gikatahong namalit og mga kinawat nga butang gikan sa nasunog nga palengke.

Hugtanong nagpasidaan si Police Chief Insp. Solomon De Castilla, ang hepe sa kapulisan sa dapit ngadto sa mga tag-iya og junk shop nga likayan ang pagpamalit og mga bakal ug uban pang gamit gikan sa nasunog nga palengke.

Matod ni De Castilla nga ang maong mga butang, gipanag-iyahan gihapon sa lokal nga gobyerno ug di angay nga hilabtan sa ni bisan kinsang tawo.

Nasuta gikan ni Engr. Emmanuel Pagaran, empleyado sa munisipyo nga ubay-ubay na nga mga gamit sama sa mga puthaw nga tubo, bakal ug uban pang nahibilin sa sunog ang gihinay-hinayan pagkawat sa pipila ka mga tawo.

Matud sa kapulisan nga gihimong panginabuhian sa uban ang nasunog nga palengke pinaagi sa pagpanguykoy og mga bakal aron ibaligya sa mga junk shops.

Gumikan niini, gikordon dayon sa munisipyo ang lugar ug hugtanong gidili ang pagsud sa si bisan kinsa sanglit gitakdang kasohan ang masakpan nga manghilabot sa mga nahibilin sa sunog.

Nagpahimangno sab ang otoridad ngadto sa mga junk shops nga ilang bawion ang mga napalit nga bakal.

Kahibaloang nidanyos og kapin P50 milyones ang sunog nga nahitabo sa building 1 sa merkado publiko sa lugar human niulbo ang mga baligyang paboto niatong Disyembre 27.

112 ka mga negusiyante ang nawad-an sa gi-abangang puwesto ug hangtud karon, naghuwat gihapon nga ipaguwa sa lokal nga gobyerno ang gisaad nga tabang sa kantidad P10 mil.

Wa gihapon nadakpan sa kapulisan ang lalaking gipasanginlang naglabay og sigarilyo ngadto sa mga paboto nga sinugdanan sa dakong sunog.