KWARTA mobalor ngadto sa P16 mil, cellphone ug mga importanteng dokumento ang nahanaw sa usa ka negosyante human siya gikawatan sa wa mailhing mga lalaking nagtakuban nga kustomer sa iyang tindahan.
Nahitabo kini didto sa Curvada, Barangay Magdum, dakbayan sa Tagum, Huwebes sa buntag.
Igo na lamang sa pagsumbong sa presinto sa kapulisan ang biktima nga si Joan Mahusay, 34, ug molupyo sa susamang dapit.
Sa nahagpat nga report gikan sa Tagum City Police Station, nasayran nga pasado alas 9:30 sa buntag nahitabo ang pagpanulis.
Matud sa biktima, iya lamang nadiskubrehan nga nahanaw na ang iyang pouch nga dunay sud nga kuwarta nga mobalor og P16,000.00, Nokia nga cellphone ug mga importanteng dokumento nga gituohang gikawat.
Sumala sa biktima nga ang pouch, gibutang niya sa ibabaw sa lamesa sulod sa nahisgutang tindahan.
Dugang sa biktima nga iyang gidudahan nga ang duha ka wa mailhing mga lalaking nga nagpailang mga kustomer ang nagkawat sa salapi.
Nakahigayon matud pa sa pagkawat ang mga suspek sa dihang nagpakapuliki sila sa pag-atiman sa uban nilang mga kustomer nga midagsa sa ilang tindahan.
Ang kapulisan sa dakbayan sa Tagum mihimo na sab karon og dugang imbestigasyon bahin sa hitabo.(Marvin Pineda)