UPAT ang patay ug laing pito ang naangol sa panag-engkwentro nga nahitabo tali duha ka mga armadong grupo didto sa probinsiya sa Maguindanao.

Subay sa taho gikan sa Tactical Command post sa 6th Infantry (Kampilan) Division sa Philippine Army nga alas 4:40 sa hapon, Enero 7, nag-abot ang grupo nila Kumander Ameril Umbra Kato sa 105th Base Command sa lawless Moro Islamic Liberation Front (MILF) group ug mga ginsakpan sa Civilian Volunteer Organization (CVO) renegades sa barangay Kitango, Datu Saudi Ampatuan.

Ang away milungtad hangtud alas 9:00 sa kagabhion gamit ang mga tag-as nga armas.

Sumala pa nga pag-abot sa alas 5:00 sa sunod nga buntag miulbo na sab ang pinusilay sa magka-away nga grupo hinungdan sa paghiklin sa gatusan ka mga pamilya sa kahadlok nga maipit sa kagubot.

Nahunong lamang ang mga buto-buto sa armas dihang miabot ang dugang puwersa sa kasundaluhan.

Matud ni Esmael Camsa, barangay kagawad, nga upat ang napatay sa engkwentro sa duha ka mga grupo, pito ang nasamdan apil na ang duha ka mga sibilyan nga naigo sa mga saag nga bala.

Nagsugod ang kagubot dihang gipusil patay si Datu Piang Municipal Councilor Junrel Kamaong ug mibawos lang iyang mga paryente.

Milihok gilayon si Maguindanao Acting Governor Bai Nariman Ambolodto aron matabangan ang mga bakwit ug maresulba ang kagubot.

Nagpadala na usab og dugang puwersa sa militar si 6th ID Chief Major General Anthony Alcantara alang sa seguridad sa mga sibilyan batok sa nag-away nga mga grupo. (Edgardo Fuerzas)