PATAY ang usa ka mag-uuma human gipusil sa siyudad sa Cotabato. Ang kapulisan nag-ila sa biktima nga mao si Acmad Tayuan, 55 anyos, minyo ug molupyo sa Datu Piang, Maguindanao Province.

Basi sa taho nga nahagpat gikan sa Cotabato City Police Office, nasuta nga banda alas 10:20 sa buntag, Enero 7, naglakaw ang biktima sa purok Sayon, barangay Rosary Hieghts Mother, aron bisitahon ang iyang paryente sa diha nga giatangan sa duha ka wala mailhing mga suspek ug gipusil gamit ang kalibre .45 nga pistola.

Patay dayon si Tayuan nga naigo sa iyang tiyan ug likod samtang ang mga mamumuno dali nga miiskapo sakay sa usa ka motorsiklo paingon sa wala matino nga direksyon.

Matud ni Lumbai, nga una gipatay ang iyang bana, dunay naka-away kining grupo sa ilang dapit gumikan lamang sa bikil sa yuta nga ilang giugmad.

Ang kapulisan ang padayong nanubay aron gyud masuta ang tinuod nga motibo sa pagtipi sa biktima, ila sab nga mailhan ug madakpan ang mga suspetsado.(Edgardo Fuerzas)