USA ka American national ang nabilanggo sa San Pedro Police Station human siya gireklamo sa duha ka mga bayot kinsa iyang gipugos nga mogamit og druga sulod sa motel niadtong Enero 2, 2010.
Si Ryan Sean James, hamtong ang pangidaron, nag-antos karon sa kabugnaw sa iyang selda humang gisikop sa kapulisan niadtong Huwebes.
Si James gisikop ni PO3 Danilo Gutierrez human mireklamo sila Alvin Jay (bansagon gitago sa Superbalita), nagpuyo sa Barangay 2-A Poblacion ug Arnold (bansagong gitago sa Superbalita), nagpuyo sa Father Selga, Barangay 8-A Poblacion.
Sila Alvin Jay ug Arnold nagbutyag sa kapulisan nga nagkita sila sa suspetsado sa alas 2:00 sa kaadlawon niadtong Enero 2 ug nagkasabot sila nga magkuyog sa motel nga gipuy-an sa suspetsado.
Mga nagreklamo giingon nga mikuyog sa amerikano ubos sa kasabotan nga bayaran sila sa ilang serbisyo nga mao ang pagpakighilawas sa amerikano.
Samtang didto na sila sa lawak sa suspetsado, gipugos sila niini sa paggamit og druga (morphine) apan wala sila misugot hinungdan nga nagkarambola sila sulod sa motel.
Si James nasuko ngadto sa mga bayot mao nga iyang gipriso sa iyang lawak ang duha, apan nakalingkawas si Alvin Jay ug nangayo og panabang sa font desk sa motel.
Ang front desk na maoy nanawag sa Central 911 mao mga miresponde ang kapulisan.
Nakuha gikan sa iyang mga kamot ang usa ka hait nga kutsilyo ug duha ka pakite sa morphine dihang gisikop siya sa kapulisan.
Si James nanghimakak sa pasangil kaniya dihang gipakisayran sa Superbalita kagahapon didto sa San Pedro Police Station.
Giandam na sa kapulisan ang tukmang kaso batok sa suspetsado aron ipasaka ngadto sa korte. (AD)