KAMATAYON ang misugat sa usa ka trisikad driver samtang namasada sa alas 2:00 sa kaadlawon kagahapon didto sa Luz Kinilaw Place, Boulevard, Barangay 23-C Poblacion, siyudad sa Davao.

Ang biktima giila sa kapulisan nga mao si Saddam Harnata Macabawi, 18, ulitawo, nagpuyo sa Barangay 23-C Poblacion, ning siyudad.

Si PO3 Rodel Asupan, duty investigator sa Sta. Ana Police Station, nagbutyag sa iyang spot report nga namasada ang biktima sa maong lugar sa wala pa siya gipusil sa wala mailhing mamumuno.

Nasayran nga nagmaneho ang biktima sa iyang trisikad sakay ang iyang mga higala gikan sa Mini Forest, Boulevard apan dihang miabot sila sa Luz Kinilaw Place giatangan sila sa mamumuno.

Samtang nalingaw pagsikad ang biktima sa iyang trisikad kalit siyang gipusil sa mamumuno gamit ang wala masayri nga kalibre sa armas sa makaduha ka higayon tumong sa iyang likod.

Human mipaka ang buto sa armas, suma sa mga higala sa biktima, ang mamumuno daling misakay sa usa ka motorsiklo nga nagpaabot kaniya pipila ka metros ang gilay-on sa nahimutangan sa biktima.

Samtang gitabang ang biktima sa iyang mga higala, mga mamumuno daling nahanaw sa ilang panan-aw paingon ngadto

sa wala na masayri nga lugar.

Si Macabawi daling gidala didto sa Davao Mission Hospital apan gibalhin sa iyang mga kabanay didto sa Davao Medical Center (DMC).

Alas 3:00 sa kaadlawon, suma sa progress report sa kapulisan, namatay ang biktima samtang giatiman sa

mga doktor sa maong tambalanan.

Gisusi karon sa kapulisan kung unsa ang motibo sa mamumuno aron duna silay kapasikaran sa pag-ila ug pagsikop kanila.