USA ka drayber sa habal-habal ang napalgang patay paghilabay sa upat ka adlaw sukad nga siya gikatahong nahanaw didto sa lungsod sa Sta. Cruz, Davao del Sur.
Human sa upat ka adlaw sukad nahanaw si Marvin Lao, didto na siya naabtan sa TCC Funeral Homes sa iyang pamilya.
Sumala sa taho nga nakit-an ang lawas sa biktima didto sa Sitio Lacobe, Barangay Zone 4, sa lugar.
Sumala sa kapulisan ang biktima adunay mga samad dinunggaban nga gituohang agi sa ice pick.
Si Gilbert Lastimado, bayaw sa biktima, nanaghap nga gitulis ang biktima una pa kini gipatay sanglit wala na sa bulsa sa iyang pantalon ang iyang pitaka.
Nasayran nga ang biktima kalit nga nahanaw sa miaging semana.
"Karnap ug tulis gyud kay nawala man ang iyang motor unya kadtong iyang pitaka duna gyud to'y sulod nga kwarta," sumala ni Lastimado.
Apan ang Sta. Cruz Police nagdumili una paghatag og pamahayag kun unsa ang motibo sa krimen sanglit ila pang gisubay ang kaso.
"Sa pagka-karon di pa sab ta makasulti kinsa ang probable suspect pero nagpadayon gihapon ang imbestigasyon sa maong kaso," pahayag ni hepe police Inspector Rodrido Tajo.
Nagpahimangno karon ang kapulisan ngadto sa mga drayber og habal-habal nga mga motorsiklo nga di mag-kompiyansa sa ilang pasakyong pasahero.
Sigun sa kapulisan angay mag-amping ang mga drayber ilabi pa kung kadudahan ang nawong sa mga mosakay sa ilang motor.
Sagad nga istilo sa mga tulisan ug karnaper og mga motor mao ang paghaylo sa mga drayber nga pakyawon sila og dakong kantidad, ug kun ugaling makombinse didto na sila tulison sa mingaw nga mga dapit. (Dondon Dinoy)