TAKDO usa ka tuig karong adlawa dihang gisaulog ang kapistahan ni Sr. Jesus Nazareno diin nia na sa dakbayan ang imahen sa Black Nazarene nga gikan sa Quiapo sa kaulohan.
Niadtong niaging tuig gidugok sa daghan nga mga deboto ang imahen sa black nazarene gikan pa sa pag-abot niini gikan sa kaulohan. Dili usab tiaw ang katawhan nga nisunod sa prosisyon gikan sa San Agustin Cathedral ngadto sa Jesus Nazareno Parish diin kini permanente nga gipahimutang. Gani ang parokya sa Jesus Nazareno Parish nagkinahanglan karon og mg donasyon alang sa tukoron nga chapel sa black nazarene diha sa simbahan sa Nazareno.
Atol sa pag-abot sa maong imahen ning dakbayan duna kitay nadungog nga pagbiay-biay, labi na gyud kadtong mga lahi og pagtuo. Kong inyong mahinumduman, sunod-sunod nga mga baha ang nisinati ning dakbayan sa Cagayan de Oro niadtong niaging tuig ning susamang mga panahon. Dunay pipila nga nibasol sa pag-abot sa black nazarene ning dakbayan. Kay kuno nasuko ang Ginoo sa gipakita nga pagdayeg sa daghan nga mga tawo sa maong imahen busa gikastigo ang katawhan sa siyudad. Duna pay nag-ingon nga unsa kuno ang mahimo niadtong mga nagsunod sa prosisyon nga kahoy ra man kanang ilang gisunod.
Karon ning ikaduha nga higayon sa prosisyon gilauman ang mas daghan pa ang mga deboto nga moabot gikan sa nagkalain-laing lugar sa Mindanao tungod kay daghan na man unya ang nasayod sa presensiya sa imahen sa black nazarene. Imbis nga moadto sa Kaulohan dire na lang unya paingon sa siyudad ang mga deboto nga taga Mindanao.
Ang ako lang, alang niining mga lahi og pagtuo ayaw na lang kamo panghilabot kundili respetohi ang pagtuo sa uban aron sa ingon walay gubot. Kon ikaw wala nituo, pagpabilin sa kon unsa ang imong gituohan sa walay pagpanghilabot sa uban. Kay mao man kana ang ilang pagtuo nga makatabang kanila ang imahen nan wala na kamoy labot niana, matud pa nila 'mind your own business'. (Jen L. Besere | Labtik)