NABALI ang abaga ug bun-og sa laing-laing parte sa lawas ang naangkon sa 46 anyos nga panday human nahulog niadtong Huwebes mga alas 11:45 sa buntag sa Upper Balulang ning siyudad sa Cagayan de Oro.

Giila ang biktima nga mao si Edgardo Salarda, minyo, lumad nga taga lungsod sa Sugbongcogon, Misamis Oriental nagtrabaho isip panday sa Condotel Construction.

Nasayran nga anaa sa 2nd floor nga bahin ang gitrabahoan sa biktima niadtong tungora. Atol sa iyang pagtrabaho kalit lang kini nga nadigyas hinungdan sa pagkahulog. Nidapat ang abaga sa biktima hinungdan sa pagkabali niini samtang gibati usab kini ug grabeng kasakit sa kalawasan.

Tungod niini, gidala pagdali ang biktima sa Northern Mindanao Medical Center (NMMC) ning siyudad ug padayon pang giatiman sa doktor.

Sa susamang hitabo, usa gihapon ka panday ang nahulog samtang nag-renovate sa ilang panimalay sa Macanhan, Carmen ning siyudad.

Giila ang biktima nga mao si Randolp Guren, 42, minyo sa susamang dapit. Nahitabo ang insidente niadtong Huwebes mga alas 5:00 sa hapon.

Gikan na nga nagtrabaho sa ikaduha nga bahin sa panimalay ug paingon na nga manaog ang biktima dihang aksidenteng nadigyas hinungdan sa pagkahulog niini.

Nabali ang tiil sa biktima apil ang kamot niini hinungdan nga gidala sa Jr. Borja Memorial Hospital ug giduso sa NMMC.