GIPABUHAGAY ni Floyd Mayweather Jr. nga dili siya kon dili si pound-fofr-pound champion Manny Pacquiao maoy hinungdan nga wala madayon ang labing dako untang away ning panahuna.

Gipasabot ni Mayweather nga nipaubos na siya sa iyang sugyot kabahin sa kon kanus-a ipahigayon ang blood testing apan wala gihapon miuyon ang Pambansang Kamao sa Pilipinas.

For updates from around the country, follow Sun.Star on Twitter

Gitataw sab ni Mayweather nga bisa’g napalpak na ang negusasyon, aduna pa gyud gihapon siya’y tinguha nga pirmahan ang kontrata sa away, nga giplano untang ipahigayon karong Marso 13 sa MGM Grand sa Las Vegas.

Nagkanayon si Mayweather nga nasagmuyo gyud siya nga gibasol siya sa kampo ni Pacquiao kon nganong dili madayon ang away.

“In my opinion it is Manny Pacquiao and his team who are denying the people a chance to see the biggest fight ever,” matod ni Mayweather.

“I know the people will see through their smokes screens and lies. I am ready to fight and sign the contract. Manny needs to stop making his excuses, step up and fight.”

Sa pasumbingay nga tono, matod ni Mayweather nga dili lang siya gustong makig-away kang Pacquiao, gusto gyud niya kining kulatahon og maayo.

“First and foremost, not only do I want to fight Manny Pacquiao, I want to whip his punk a—,” batbat ni Mayweather.

Giklaro ni Mayweather nga imbis duha ka mga adlaw, nisugot na siyang 14 ka mga adlaw kuhaan og blood test si Pacquiao apan wala gihapon kini uyoni sa kampo sa Pinoy.

Gikan sa 30 ka mga adlaw, nipakanaog sab ang kampo ni Pacquiao ngadto sa 24 apan nagmagahi sab gyud ang kampo ni Mayweather sa 14.

Ang duha ka adlaw nga mediation nga gidumala ni retired federal judge Daniel Weinstein wala gyud makasalbar sa away.