GIANUNSYO sa facebook page sa Top Rank Promotions nga depensaan ni pound-for-pound champion Manny Pacquiao (50-3-2, 38KOs) ang iyang WBO welterweight title batok kang American Joshua Clottey (35-3, 20KOs) karong Marso 13.

Wala pa mahisguti ang venue apan gituohang mapahigayon kini sa MGM Grand o Thomas and Mack Center sa Las Vegas, USA.

For updates from around the country, follow Sun.Star on Twitter

Si Clottey, kinsa sama kang Pacquiao sakop sab sa Top Rank ni Bob Arum, maoy mohulip sa luna nga alang unta kang Floyd Mayweather Jr.

Bisan pa sa duha ka mga adlaw nga mediation sa pagpatunga ni retired federal judge Daniel Weinstein, wala gyud naresolba ang panagtigi nila ni Pacquiao o Mayweather kabahin sa blood testing.

Tungod niini, dili madayon ang labing dako untang away ning panahuna hinungdan nga naaghat si Arum pagpangita og laing kontra alang sa Pinoy boxing superstar.

Sa sayo pa, tunog kaayo ang pangalan ni middleweight Yuri Foreman nga maoy mohulip kang Mayweather.

Apan mismong ang facebook page na gyud sa Top Rank ang mianunsyo nga si Clottey maoy napilian ni Arum.

Kausa ra miaway sa si Clottey sa miaging ug napildi siya pinaagi sa kontrobersal nga split decision batok kang Miguel Cotto.

Sa maong kadaugan, nakakuha og kahigayunan si Cotto nga makig-away kang Pacquiao apan gikastigo siya’g maayo sa Pambansang Kamao sa Pilipinas.

Nakamugna og dakong pangalan si Clottey dihang midaog siya batok kang Zab Judah niadtong 2008 aron angkunon ang IBF welterweight title pinaagi sa TKO 9.