NAGBAHA ang kalingawan dinhi sa Sugbo sukad pa niadtong Pasko, Bag-ong Tuig hangtod na ning panahon nga nagsingaboit ang kapistahan ni Senyor Santo Niño. Left and right matod pa ang mga baligya.
Apil na ang inom ug ubang matang sa hudyaka. Sa mga bisita di gyud tingali ninyo makalimtan ang inyong mga kasinatian nga nindot dinhi sa Sugbo. Apan ayaw og sugot nga maduhigan kini sa mga kalagot, pagmahay ug kagul-anan. Ang akong buot ipasabot ayaw palabi hangtod nga makalimot na hinuon ka pagbantay sa imong kaugalingon batok sa mga badlungon. Kay nia man sa Sugbo ang way putol- putol nga kasadya, nia sab dinhi maglublob ang mga balhibuon og kamot.
`Niadtong Disyembre pa ni sila, apan hangtod karon naa pa gihapon sa mga eskina, wa pa mamauli sa probinsya kay gusto sab nga mamista. Maayo unta kon madakpan aron sa prisuhan sila magsinulog.
CASILI
Naunsa na man ning pinuy-anan sa akong kauban diha sa Casili, Consolacion, nga ang mga tulisan mag-atang na man sa imong pinuy-anan.
Diha sa sitio Bato, dimalasa kay naka-motor man og 110 nga Honda, aw siya maoy puntarya sa mga kawatan og motorsiklo.
Kay made in Japan daw way sagol China, kinaham ni nila.
Si Doming nga migawas sa ilang panimalay pasado ala una sa kaadlawon aron mo-duty. Pastilan kurata kay samtang nagmaneho sa iyang motorsiklo gidumbol siya sa naghaguros nga motorsiklo.
Abi niya og komedya, tininuod diay kay ang tulo ka tawo armado ug ang tuyo mao ang iyang motorsiklo. Maayo gani kay nakapasirit siya palayo mao nga wa na siya makit-i sa mga tulisan.
Apan ang tinuod nga estorya mao nga didto diay siya padung sa canal sa tantong lihay sa mga tulisan.Nalukot ang ligid sa iyang motor nagbawon pa gyud siya og mga bukol. Kamong taga Bato, lili-a daw ninyo ang inyong palibot basin kamoy isunod.
DEBOTO
Daghang paagi unsaon nimo pagpadayag sa imong debusyon ngadto kang Señor Santo Niño. Kadtong akong na-interview sa pagsugod sa novenario, naghisgot og mga pangadye, paghalad og buwak, pamisa, ug pagtultol sa mga importanting adlaw sa balaang Bata. Si Tatay Egino Peñas nga taga Linao, Talisay City naghisgot kanako og mga pagsimba matag adlaw.
Hinuon napawong kini sa diha nga nakasugat siya og aksidente.
Nasayran nako kini gikan gyud mismo niya nga ang padayon nga pagtuman sa kabubut-on sa Labawng Makagagahom dako kaayo og kahulogan sa iyang taas nga pangedaron nga maoy sentro sa celebrasyon gahapon.
Si tatay Egino motuo mo og sa dili, 100 ka tuig na ang pangedaron gahapon. Busa sa pamilyang Peñas diha sa Talisay, ipadayon ang inyong pagpangga kang Tatay Hino. Ug kang tatay Hino, kita ta og usab sa ika 101 nimo nga birthday.