SA kalit nga pagkatidlom sa gikahinaman unta nga away ni Filipino boxing icon Manny Pacquiao ug undeafeated Floyd Mayweather Jr., nasagmuyo ang tibuok kalibutan sa natad sa boxing.

Pakyas ang ikaduhang negusasyon nga mao unta ang makapabuhi og balik sa gihulagway nga megafight nga gituohang maoy mobuak sa pay-per-view record sa kasaysayan.

For updates from around the country, follow Sun.Star on Twitter

Gamayng butang nga mao ang paagi sa drug testing ang nahimong dakong babag sa nahisgutang away.

Misugot na unta si Manny nga ipahigayon ang blood ug urine test 24 ka adlaw sa dili pa ang away gikan sa 30 ka adlaw nga ilang gisugyot sa sayo pa, apan nagmagahi gihapon ang grupo ni Mayweather ug mipabuhagay nga ari na usab sa 14 ka adlaw himuon ang drug testing.

Sa kasaysayan sa pamoksing, tagsaon kining maong mga kondisyon nga gipangayo ni Mayweather. Ug sa samang higayon, naghatag kini og daghan hinuong pangutana.

Sa 40 ka away ni Mayweather diin 25 niini iyang gipang-knockout, nganong karon ra man siya mo-demand og ingon niini nga style nga drug testing? Dili ba kaha nga psywar lang ang gihimo ni Mayweather ug sa amahan niini aron maguba ang mental preparation ni Pacquiao?

Nganong si Mayweather ra man ang nagsigi og kutikuti sa maong away kon wa pa gyud siya magpanagana ni Pacquiao? Nangutana lang.