NAGTINGUHA si Labangon barangay kapitan Felix Abella nga tigumon ang tanang mga sakop sa gang ug fraternity sa ilang barangay aron mahunong na ang gang war.

Nahukman kini ni Abella human duha na ka kinabuhi ang nakalas gumikan sa gang war sukad niadtong Nobyembre.

For updates from around the country, follow Sun.Star on Twitter

Apan si PO2 Leroy Baguio sa Homicide Section sa Cebu City Police Office (CCPO) niingon nga kadaghan na silang makaresponde og shooting incident sa dapit nga gang-related.

Wa pa hinuon matino ni Abella kon kanus-a ipahigayon ang tigom kay matod niya iya pang ipasubay ang mga gang-related incident sa ilang barangay.

Matod ni Abella nga kon matinong mga menor-de-edad ang mga sakop sa gang ug frat, tinguha niini nga ipaapil og patawag ang mga ginikanan.

“Suwayan nato og hilot kon mahimo pang hiluton pero ato gyung paningkamotan aron wa nay mabiktima,” nagkanayon si Abella.

Giklaro hinuon ni Baguio nga di lang mga sakop sa Bloods ug Crips ang malambigit og kagubot sa maong barangay kay duna sab silay narespondihang alarma nga naglambigit usab sa Arkho.

Ang uwahing insidente sa sityo Bonami nikalas sa kinabuhi sa 19-anyos nga sakop sa Akrho nga si Jeremy Vincent Magtagad.

Matod ni Baguio nga sa niaging tuig, dunay pagpamusil usab ang nahitabo sa samang dapit diin namatay usab ang biktima.

Tungod sa maong insidente, mas pahugtan pa ang pakig-alayon sa barangay sa kapulisan aron mapahugtan usab ang ilang police visibility. (CPL)