TALIWA sa pagsulbong sa mga tag-as nga edipisyo dinhi sa Sugbo, ang Bureau of Fire Protection (BFP) niistrikto pag-ayo sa pagpatuman sa fire safety measure.

Kini gumikan kay sa pagkakaron giangkon sa kabomberohan nga wa gyud silay igong kapabilidad sa pagresponde sa mga sa sunog sa high-rise building.

For updates from around the country, follow Sun.Star on Twitter

Matod ni SFO2 Ali Kasim Espinola, usa sa mga imbestigador sa Cebu City Fire Department, nga wa silay saktong kahimanang magamit kon ang sunog motumaw sa taas na nga edipisyo.

Sa kasamtangan ang bugtong ekipo sa kabomberohan mao ang aerial ladder nga matod ni Espinola makaabot ra kutob sa 7th floor ug depektuso pa gani.

“Kon mahitabo gyud, mano-mano na lang ang pagsaka unya sumpay-sumpay lang ang hose,” nagkanayon si Espinola.

Hinuon dunay breathing apparatus ang kabomberohan nga ilang magamit kon mosud sila og building nga puno na sa aso.

Duna na say gi-activate nga special rescue unit (SRU) nga gilangkuban og mga highly trained firemen nga maoy mosungasong sa mga dagkong sunog aron mopahigayon og rescue.

Matod ni Espinola nga ang gikinahanglan sa pagresponde sa sunog sa high rise building mao ang mga aerial ladder ug kon mahimo helicopter.

Mapasalamaton lang hinuon ang BFP kay wa pa sukad nahitabo dinhi sa Sugbo nga dunay nasunog nga building nga nanukad gyud sa kinatas-ang andana.

Tungod sa kakuwang sa maong mga ekipo, matod ni Espinola nga ang ilang gitutokan mao ang preventive measure pinaagi sa pagpasubay sa tanang mga building sa saktong fire safety nga mga lagda.

Kini naglakip sa pagbutang gyud og mga smoke-detector, sprinkler, extinguisher ug standpipe sa matag andana sa building.

Kinahanglan nga wa say nakababag sa ilang fire o emergency exit aron kon gikinahanglan ang evacuation, dali rang makadagan ang mga tawo.

Namatikdan hinuong nisaka ang gidaghanon sa mga sunog nga girespondihan sa kabomberohan sa siyudad sa Sugbo sa niaging tuig kay niabot sa 132 itandi sa 102 lang ka mga alarma sa 2008.

Moabot P74.75 milyunes ang kinatibuk-ang danyos sa sunog sa niaging tuig diin ang buwan sa Oktubre maoy nakatala og kinadak-ang danyos nga P23.8 milyunes ug kini naglakip sa sunog sa LGC Marketing sa M.J. Cuenco avenue.

Duha sab ka mga kinabuhi ang nakalas nga mas minos itandi sa 2008 ug 11 ang nangaangol.

Nag-unang mga rason mao ang electrical misuse, open flame sama sa kandila ug gibiyaang linung-ag, sigarilyo ug LPG. (CPL)