GISUGAT og kontrobersya ang 1st “Sinulog Kiddy Run” kagahapon sa Banilad Town Center Compound sa brgy. Banilad, Cebu City.

Si Levi Cortes, public teacher, amahan sa usa sa mga bata’ng nidagan sa 13 under category nga si Dryan, nireklamo sa mga nag-organisar kon ngano’ng gipalibot pa pagbalik ang iyang anak dihang duol na kini sa finish line nga maoy hinungdan sa kapildihan niini.

Apan gipasabot sa mga nag-organisar nga gipangulohan ni Joel Baring nga wala sila nasayop kay sakto ang ilang pag-ihap kon kapila na nakatuyok ang mga partisipante.

For updates from around the country, follow Sun.Star on Twitter

“Kung audience ra man gud, di ta mag-ihap sa paglibot sa mga bata apan amo-a na nga gi-ihap ug naglista mi kada tuyok sa runners,” tubag ni Baring.

Sa 8-under boys, si Cyril Borbajo maoy midaog, ikaduha si Mark Rodel Luyao ug ikatulo si Ern Cardenas unya sa 8-under girls si Krisianyl Alianec maoy midaog, ikaduha si Audrey Therese Valles ug ikatulo si Ariana Aldeguer.

Nikampiyon sa 10-under boys mao si Alexis Ylanan, ikaduha si Yuan Chiongbian ug ikatulo si Ian Alianec samtang sa 10-under girls kampiyon si Karina Kurvo, ikaduha si Queenhe Rose Ygot ug ikatulo si Nyza Archival.

Kampiyon sa 13 under boys mao si Prince Joey Lee, ikaduha si Joey Lee Jr. ug ikatulo si Justin Chiongbian samtang mikampiyon sa 13 under girls si Adela Canillo sa USP, ikaduha si May Jeameka Contemplo ug ikatulo si Kriselda Alianec.