GIPASIATAB sa kampo ni World Boxing Council (WBC) Youth Intercontinental flyweight champion American Anthony Villareal nga kumbinasyon nila Floyd Mayweather Jr. ug Shane Mosley ang abilidad sa ilang batos.
Mao kini ang gipabuhagay sa trainer ni Villareal nga si Alberto Franco kagahapon sa press conference kagahapon sa Patio Isabel restaurant sa Banilad.
Ang pasiatab ni Franco gituohang makabagting gyud sa dunggan ni ALA boy Milan Milendo (19-0, 5KOs), kinsa maoy mosuway pag-ilog sa korona ni Villareal (9-2, 4KOs) sa main event sa “Bakbakan sa Sinulog” karong Enero 14 sa Waterfront Hotel sa Lahug, Cebu City.
Matod ni Franco nga ang depensa ni Villareal sama sa estilo ni Mayweather unya ang iyang opensa sama sa kang Mosley.
“He (Villareal) has Floyd’s defense and Mosley’s aggressiveness. He will bring a style that Melindo has yet to face,” matod ni Franco.
Si Villareal nagkanayon nga nagpanikad na gyud siya alang ning awaya apan wala hinuon siya mihatag og prediksyon.
“I’m ready to go. We come here to win, not to lose,” asoy ni Villareal.
Ang kontra sa laing ALA boy AJ “Bazooka” Banal (20-1-1, 16KOs) nga si Mexican Cecilio Santos (24-11-3, 14KOs) nipadayag sab sa iyang dakong pagsalig.
Si Santos, kinsa gikan sa impresibong 1st round knockout nga kadaugan batok kang Cesar Martinez sa miaging buwan, nagkanayon nga tinguha gyud niyang sugdan ang tuig 2010 pinaagi sa impresibo sab nga kadaugan.
Hugo tang iyang pagsalig nga iya kining matuman gumikan kay dako gyud kaayo ang iyang bintaha sa kasinatian kumpara kang Banal.
“He wants to start the year strong. He said his experience is his biggest advantage over Banal,” asoy usa ka translator.