ISIP mayor sa Syudad sa Mandaue, responsibilidad ni Mayor Jonas Cortes ang pag-ayo sa mga libaungon nga mga dalan. Makita man sa tanan bisan sa mga di taga Mandaue.

Apan wa kini atemana sa mayor. Palpak siya kon atong hisgutan ang pag-ayo sa mga dalan sa syudad. Gani, atong nasuta nga di tinuod ang iyang pamahayag nga niguwa sa Sun.Star Cebu sa imaging semana nga bag-o lang giaspalto ang dalan R. Colina.

For updates from around the country, follow Sun.Star on Twitter

Hinuon, nabalaka siya nga ang iyang kaatbang sa umaabot nga piliay nga si Kong. Nerissa Soon-Ruiz mao nay nangunay sa pagsemento sa dalan R. Colina. Pinaagi sa pundo nga gikan sa congressional funds ni Inday Nerry, nagdala na ang Department of Public Works and Highways (DPWH) sa mga ekipo ug nagsugod na gyud sa pagtarong sa maong dalan dihang nikalit pag-abot ang mga tawo ni Jonas.

Naninguha ang mayor nga babagan kini ginamit ang kapulisan lakip na ang Special Weapons and Tactics (Swat) unit sa Mandaue sa pagtuo nga kini makapasaka sa pagtan-aw sa mga taga Mandaue babaye nga kongresista. Gikuyawan si Jonas nga isipon sa mga Mandauehanon nga mas angayang magmayor si Inday Nerry nga duna pay nabuhat kay sa kang Jonas.

Imbes tarungon ni Jonas kining ubang mga dalan, mas mahinungdanon niya nga di makuha ni Inday Nerry ang pagbati sa mga Mandauehanon pinaagi sa pagbabag sa pagsemento sa maong dalan.

SWAT

Bisan pa man sa iyang mga pangugat ug paggamit sa kapulisan nga sama sa private army sa mga Ampatuan, palpak sab si Mayor Cortes sa pagbabag sa maong proyekto nga gipangunayan gyud ni Inday Nerry.

Bitaw, sama si Mayor Cortes sa mga Ampatuan nga nagdala sa kapulisan nga sama og private army aron pahunongon sa trabaho ang mga kawani sa DPWH ug ni Inday Nerry. Ang rason sa mayor nga duna sab siyay proyekto sa maong dalan. Niingon na ang iyang kampo sa reporter sa Sun.Star Cebu nga bag-o lang kini giaspalto bisan og wa.

Ambot lang sab niining mga pulis sa Mandaue nga nagpagamit man sab. Ang kadagkuan sa Philippine National Police (PNP) man unta ang ilang labaw ug di ang mayor.

Sakto gyud kini ang retiradong si Col. Rico Palcuto nga nagkanayon nga kinahanglang usbon ang PNP law aron putlon na kining gahum sa mga mayor nga mopili og hepe sa kapulisan. Moresulta man gud kini sa pagpili og hepe nga sipsip sa mayor.

Kon magkasumpaki ang kagustohan sa mayor ug sa tukmang balaod, kuyaw nga moduyog ang hepe sa nagpili kaniya. Ilisdan pa lang.

KASABUTAN?

Maayo na lang kay nakahunahuna si Mayor Cortes nga moatras ug isip face saving, niuyon siya niining giingong kasabutan aron kintahay magtinabangay na lang ang mga tawo sa DPWH ug City Hall sa pagtarong sa dalan R. Colina.

Tungod niining maong kasabutan, napatigbabaw ang kalinaw ug napadayon ang proyekto ni Inday Nerry.

Sa akong pagtan-aw diri sa layo, dakong kadaugan kini sa kongresista.

Kon atong huna-hunaon man gud, nilutaw na karon ang kamatuoran nga way nahimo si Jonas sa pagtarong sa kadalanan sa Syudad sa Mandaue ug maka-pangutana kita kon asa na ang dakong pundo nga gigahin sa Konseho alang niini.