HUMAN milayat si Vice Gov. Greg Sanchez gikan sa One Cebu Party, giipit ug gigukod na siya sa administrasyon ni Gov. Gwen Garcia. Wala na aprobahi ang iyang mga hangyo nga pundo alang sa mga barangay ug wala na gi-renew ang kontrata sa iyang mga staff. Kaniadto nga nagkahiusa pa sila, walay screening sa iyang mga hangyo ug pag-renew sa kontrata sa iyang mga staff. Nitiyabaw ang bise gobernador nga political harrassment ang gihimo ni Gwen kaniya.
Aw, maingon gyod ana vice governor kay nganong nibiya man ka sa iyang kampo. Abi ba nako og si Mayor Tomas Osmeña ra ang mangginukdanon, hasta si Gwen man pod diay. Ingon ana gyod nang pulitika. Unsaon nga duna na may laing duol sa dughan sa gobernadora nga maoy iyang kandidato sa pagkabise gobernador atbang ni Greg. Mao nay giingon nga weder-weder lang ning pulitika.
REAKSIYON
Nakadawat ako og pipila ka reaksiyon sa atong lindog kabahin sa hudlat sa Kapitolyo ngadto sa pipila ka mga sakop sa media nga kritikal sa kagamhanan sa lalawigan sa Sugbo labi pa sa isyo sa gipaburot nga Cebu International Convention Center (CICC). Usa niini, mao ang reaksiyon ni Nenita Reyes nga atoa sa gawas sa nasod. Ania ang tipik sa iyang suwat.
u2018Mr. Nalzaro belated happy new year. Usa ako sa imong avid reader nga ania sa gawas sa nasod. Kada adlaw gyod ako mobasa sa imong column. Ako ning komentaryo sa inyong editorial. Mao kana sige birahi. Tinuod bitaw nganong ipahibalo pa man og manghulga. Ila tingaling pagtuo nga madala sa ilang hulga ang mga sakop sa media. Ug aron usab intawon ang mga nga dili tigbasahan og newspapers madala sa ilang tiinunto.’
u2018Kami diri sa gawas, kamo ra sa media ang among source sa mga balita. Dili sila gusto nga mabulingan ang ilang pangalan pero klaro kaayo base sa among nabasahan sa newspapers. Ang mga Bisaya labi pa ang mga Sugboanon mga wise voter na ug ilang matimbang-timbang kinsay kandidato nga mga seryoso.’
u2018Mao nga sige birahi pa ninyo mga mediamen ug ayaw kamo kahadlok kay kamo nahibawo sa inyong gibuhat. Kana si Rory Jon Sepulveda amo nang nahibaw-an ang iyang pagpanghulga tingali nga tan-aw niya kamo mokakak sa iyang mga hulga. Kay naninguha pod siya nga si Gwen modaog pag-usab kay kon mapilde si Gwen wala na siyay amo. Sige birahi pa. Salamat and more power Mr. Nalzaro and to all mediamen in Cebu.
(bgnalzaro@gmanetwork.com)