Pagbaha sa drugas gipabantayan sa PDEA

GAWAS sa mga tulisan ug kawatan nga gipaabot nga modagsa dinhi sa Sugbo aron mopahimus sa kasaulogan sa Sinulog, gibantayan usab karon sa mga otoridad ang pagsud sa illegal nga drugas.

Si Dangerous Drugs Board (DDB) Vice Chairman Clarence Paul Oaminal nibutyag nga taas ang demand sa illegal nga drugas panahon sa Sinulog tungod sa daghang mga tawo nga mag-abot dinhi.

Nabantayan sa DDB nga sa matag Christmas season moubos ang demand sa illegal nga drugas dinhi sa Sugbo ug kini gituohang gumikan sa pagminos sa mga tiggamitan og drugas.

“Sagad sa mogamit sa drugas mga tinun-an ug nianang mga panahon manguli ang mga tinun-an sa ilang tagsatagsa ka mga probinsiya maong ubos kaayo ang demand sa drugas,” pasabot ni Oaminal.

Apan sa subling pagbukas sa klase matag Enero hangtod na sa kasaulogan sa Sinulog, mosulbong ang demand sa drugas gumikan usab sa pagdagsa sa daghang mga tawo dinhi sa Sugbo.

“Lainlaing klase sa mga tawo ang mag-abot dinhi sa Sugbo panahon sa Sinulog maong mosaka gyud ang demand sa illegal nga drugas,”pasabot ni Oaminal.

Tungod niini, gipaalerto na sa DDB di lang ang mga pantalan ug airport sa Sugbo apil na ang ubang mga port of entry sa ubang mga lalawigan ug rehiyon.

Matod ni Oaminal nga aron mapugngan ang pagsud sa illegal nga drugas dinhi sa Sugbo, kinahanglan sa port of origin pa lang masumpo na ang pagpalusot sa illegal nga drugas.

Apan bisan kon mahuman na ang Sinulog, ang DDB padayong mo-monitor sa mga pantalan ug airport gumikan sa pagkasakmit sa kinilong cocaine didto sa Davao City nga gituohang nakalusot tungod sa pakigkunsabo sa mga cargo company.

Niadtong Biyernes, subling nagpatawag og port security anti-narcotics conference si Oaminal uban sa kapulisan, Phi. Drug Enforcement Agency, Cebu Port Authority, airport security, Bureau of Customs, ug mga sakop sa international shipping company ug cargo handlers.

Gihatagan og pagtagad sa tigom nga ang tanang mga cargo nga isakay sa mga shipping company paingon dinhi sa Sugbo kinahanglang mainspeksyon og maayo aron way ilegal nga drugas ang makalusot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph