MGA mangunguot gikan sa laing probinsya ania na karon sa Sugbo tungod sa nag-angat nga kapistahan ni Sr. Santo Niño.

Usa sa ilang gibiktima mao ang usa ka nursing student nga nakuhaan og dakong kantidad sa salapi, samtang mitambong sa mass novena sa Basilica del Santo Nino.

Si Inspector Michael Bastes, pangulo sa Theft and Robbery Section (TRS) nagkanayon nga nakadawat na sila og impormasyon nga ang ubang mga mangunguot gikan sa laing mga dapit ania na sa Sugbo.

For updates from around the country, follow Sun.Star on Twitter

Samtang ang uban atua pa sa kaulohan tungod sab sa kapistahan sa Black Nazarene sa Quiapo, Manila.

Gikatakda nga ang mga grupo nga atua sa kaulohan manabok dayon dinhi sa Sugbo aron mamiktima og mag tawo nga namista.

Gipahigayon kagahapon ang prosesyon sa Black Nazarene, diin gibana-banang gatusan sa libo ang nanambong ug nangapil.

Bisan pa man niini, gihugtan karon sa kapulisan ang pagpaniid pinaagi ra usab sa pag-abag sa ilang mga volunteer ug mga barangay tanod.

Apan usa ka dalaga igo na lang nihilak human sa misa sa dihang iyang nasayran nga wa na ang iyang pitaka.

Si Emmanuel Marie Manago, 19, taga brgy. Bacayan, siyudad sa Sugbo, nisumbong sa kapolisan sa Waterfront human mitambong sa mass novena.

Matod pa sa biktima, usa ka nursing student, nga ang nakuha kaniya mao ang dul-an sa P13,000. (JFT)