NAMATAY ang usa ka lalake nga gipusil kagahapon sa kaadlawon sa usa ka gituohang kawatan og manok sa Carcar city.

Ang biktimang si Julius Amistad, 29, taga sityo Dapdap, brgy. Poblacion 3, patay nang niabot sa ospital tungod sa usa ka samad sa iyang ulo.

Sa imbestigasyon sa kapulisan nasayran nga ang biktima nakadungog og kasikas gawas sa iyang balay pasado alas 5:00 sa buntag.

For updates from around the country, follow Sun.Star on Twitter

Ang kasikas nagagikan sa tangkal sa mga manok niyang binuhi.

Usa ka wala mailhing tawo ang iyang naabtan apan dihang nakabantay kini kaniya, nilanit kini og pusil ug gipusil si Amistas makausa ka higayon.

Si Amistad nga naigo sa iyang ulo daling gidala sa iyang mga paryente sa Carcar District Hospital, apan nakabsan sa iyang kinabuhi.

Samtang ang nipusil kaniya daling nakasibat.

Ang kapulisan nga nitubag sa alarma nakakuhag usa ka kabhang sa bala nga iya sa .45 caliber pistol gikan sa crime scene.

Sa pagkakaron ang kapulisan sa Carcar padayon pa sa ilang gihimong imbestigasyon aron mailhan ang gikatahapan.

Didto gihapon sa maong siyudad, pasado ala 1 kagahapon sa kaadlawon, usa ka menor de edad ang gipusil samtang nagduwag computer sud sa usa ka balay.

Si Leo Lañas wa makabantay sa pag-abot sa suspek nga si Jingle LapeÑa, 25.

Gidiretso siyag pusil tumong sa tiyan ug walang paa.

Ang biktima nakahimo pa sa pagdagan ngadto sa balay sa iyang iyaan bisan kon samdan na samtang ang gikatahapan daling nisibat.

Nakuha gikan sa crime scene ang lima ka mga kabhang sa bala nga gituohang gikan sa .45 kalibreng pistola.