MALIPAYON ang Megastar nga si Sharon Cuneta sa ilang adopted baby boy ni Sen. Kiko Pangilinan nga si Miguel.

Sa The Buzz, usa ka semana na ang milabay, very open na si Sharon sa iyang gisagop nga bata nga kapin duha ka buwan na sa ilang balay.

Kauban daw nila ang baby boy niadtong Pasko ug New Year ug bisan ang iyang mga bagets nga sila Frankie ug Miel, excited sa ilang baby brother.

Bisan si Senator Kiko, malipayon sab kaayo tungod kay may lalaki na sab siyang kauban sa ilang balay.

Puro girls man god ang ilang sakop gikan kang KC Concepcion, kang Miel ug Frankie.

Gitug-an ni Mega nga daghan na kaayong mga bata kaniadto ang giduol kanila aron nga ipaampon apan wala pa sila nagka-interes.

Apan ning uwahi, na-chika nga may baby nga gusto og pamilya ug didto na sila nagka-interes.

Sumala sa chika, pution ug intsikon ang mata sa bata.

Di type ni Mega nga ipakita sa publiko si Miguel hangtud wa pa nila nahuman ang pag-atiman sa mga papeles niini.

Di pa sab daw si Miguel ang katapusan nga sagupon ni Sharon.