DILI na makit-an gikan sa gawas ang selda sa Criminal Investigation and Detection Group (CIDG) Region 12 diin gibalhog ang mga Ampatuans nga nag-atubang og kasong rebelyon.
Lakip na nga dili makuhaan og video footage kadtong anaa sulod sa selda tungod sa gitukod nga kural sulod sa compound sa CIDG 12 nga mitabon karon sa bilangguan sa mga suspek.
Nasayran nga duha na ang perimeter defense sa CIDG 12 gawas sa gate.
Gipatukuran sab og kural nga kahoy nga kapin sa 10 ka tiil ang gitas-on human sa insidente nga pagwahig sa camera sa usa ka tv network tungod sa pagkuha og video footage sa selda sa mga Ampatuans sa personahe sa nasangpit nga ahensya.
Gibutyag hinuon ni CIDG 12 regional director Colonel Pedro Austria nga gibutang ang kural aron nga lahi ang agian sa mga tawo nga adunay tuyo sa ahensya ug lahi sab ang agi-anan alang sa selda sa mga Ampatuan.
Gipahayag ni Buluan Vice-Mayor Esmael Toto Mangudadatu nga gihimo kini sa ubang mga opisyal sa kapulisan aron dili makita sa mga sakop sa media ang VIP treatment nila sa mga gipangpriso nga mga Ampatuan nga gilambigit sa mangilngig nga masaker sa Maguindanao. (Edgardo Fuerzas)