GIKALIMTAN sa usa ka inahan ang iyang dakong responsibilidad sa pagpakatawo sa iya mismong anak aron hatagan kini og maayong kaugmaon ibabaw sa kalibutan gawas nga tibuok kinabuhi niyang dalhon ang mortal nga sala subay sa balaod sa kahitas-an human niya gipakuha ang makaluluoy'ng bata.
Ang maong puya (fetus) nabangalan human kini gilabay sa usa ka basurahan didto sa Barangay Lungag, siyudad sa Digos, Sabado sa buntag.
Subay sa gipagulang taho sa Digos City Police Office (DCPO), mga alas 8:45 ang oras sa buntag niadtong adlawa, gitawagan sila ni Vice Mayor Lawyer Joseph Penas ug gipahibawo kalabot sa insidente.
Gihulagway sa DCPO nga mismong sa labayanan gyud og mga basura nakit-an ang puya.
Sila si PO1 Sheila Mae Pansoy, kinsa gitahasan sa paghimo og makuting imbestigasyon, nikanayon nga unang nakit-an ni Eugenia Aparri, 47 anyos, ang puya, human siya nahidangat sa dapit aron manguykoy og mapuslang basura.
Subay sa paghulagway, gisud og usa ka plastic container ang makaluluoy'ng puya mao nga gipahibawo dayon niya si Barangay Kagawad Agustin Cabungcal, kinsa dali sab nangayo sab og alarma ngadto sa kagamhanang lokal sa dakbayan.
Wa nay nahimo ang mga imbestigador human wa mahibaw-i kung kinsa ang way puangod nga inahan nga nagbilin sa iya mismong anak didto sa basurahan.
Gidala na lang sa Angel Funeral Homes sa dakbayan ang puya aron mahimuan og otopsiya ug dugang eksaminasyon aron masuta kung pila na kini ka bulan ingon man ang paghatag niini og disenteng lubong.
Naningkamot na sab ang kapulisan nga mailhan kinsa ang maong inahan aron mapasakaan og kaso. (Orlando B. Dinoy)