ANG Davao del Sur Provincial Police Police Office (DDSPPO) nipatuman na sa pagmuntar og checkpoint sa tibuok probinsya human pormal nga gisugdan sa Commission on Election (COMELEC) ang implementasyon sa nationwide election gun ban.
Nagtuo karon ang buhatan ni Police Senior Superintendent Ronald Dela Rosa nga pinaagi niini maundang na sab ang mga nahitabong patay sa lalawigan sud sa milabay'ng tuig ugaling masikop ang mga tawong nagbaton og ilegal nga armas.
Una ng nasikop ang pipila ka mga tawo niadtong gihugtan sa kapulisan ang kampanyang 'Bilang Boga' ug 'Kontra Boga' mao nga dako ang ilang panaghap karon nga mas madugangan pa kini ugaling magmagahi gihapon ang kadaghanan sa pagtuman sa maong mando.
Way pilion ang kapulisan sa ilang pagadakpon bisan pa man og ila kining kaubanan, sakop sa militar, empleyado sa gobyerno uban pang pribadong indibidwal.
Buot sa Philippine National Police ubos sa liderato ni PNP Chief, Director General Jesus A. Versoza, nga molampos ang ilang kampanya sa usa ka malinawong eleksyon karong Mayo.
Hinungdang naningkamot ang mga ginsakpan niini nga makahimo og 'accomplishments' pinaagi sa mobile checkpoint ug police visibility sa matag dapit.
Kahibaloang sa wa pa mahitabo ang gun ban, nasikop na didto sa siyudad sa Digos si Jayme Calimba, samtang natulog sa dalang Rizal nga nagtakin og way dokumento nga kalibre. 38 rebolber.
Sayo niini, usa ka empleyado sab sa Pas Roy Merchandising, nga si Jemuel Lagunsay, ang gitionan og wa matinong kalibre sa armas samtang naglakaw pauli sa ilang balay.
Gipabuthan pa kini sa tulo ka mga suspek mao nga nakuha gikan kaniya ang iyang cellphone human ang usa sa mga wa pa masikop nga mga suspek nihapak og armas sa iyang ulo.
Dakong hagit karon sa kapulisan sa lalawigan ang election gun ban sanglit di lang ang kahapsay'g kalinaw sa piniliay ang ilang ipatuman kundi lakip na ang mga nag-unang krimen sa palibot nga ginamitan sa mga nagkadaiyang matang sa armas. (Orlando B. Dinoy)