WALAY kamatuoran ang pasangil nga dunay "warlords" sa lalawigan sa Davao del Sur sukwahi sa gipalanog ni Davao del Sur first district Representative Marc Douglas Cagas IV atol sa gihimong Christmas Party sa Davao del Sur Provincial Police Office (DDSPPO) niadtong Disyembre.
Kini ang pamahayag ni kanhi Malita Mayor Claude Bautista kinsa maoy gipatapsingan sa mga atake sa kongresista nga nagbaton og mga armado sa ilang lugar atol sa gihimong press conference niadtong Sabado didto sa Marco Polo Hotel.
"Natingala ko sa ilang giingon nga warlordism. Warlord kuno ko. Kinsa may warlord namo? Duha lang ang akong security personnel nga pulis.
Sa balay, gwardiya lang ang bantay. Dili pa gani ko dayon maablihan kay nagtuo ang guwardiya nga wala pa ko miabot," suma ni Bautista sa mga sakop sa tigbalita.
Si Bautista mikandidato karon pagka-gobernador sa maong lalawigan batok kang Governor Douglas Cagas.
"Our opponents are warlords, gani hangtud karon ang among unom ka mga supporters remained unaccounted in Malita, ambot basin gipanglubong na to sila," sulti ni Kongresista Cagas sa kapulisan nga nitambong sa selebrasyon human kini gipasulti sa iyang Christmas message.
Gihagit ni Kongresista Cagas dili lang ang kapulisan kundi lakip ang Philippine Army nga tinud-on ang ilang kawsa aron mapugngan ang bisan unsang dautang tumong sa ubang politiko, di mahisama sa gidangatan didto sa Maguindanao diin 57 ang namatay apil ang 31 ka mga sakop sa media niadtong Nobyembre 23, 2009.
"Kinsa may matawag nga warlord? Si Cagas daghan og mga body guards. Inig abot nimo sa ilang balay naay outpost, naay daghang bantay ug naay mga closed circuit television (CCTV) cameras. Sa amo, manok lang ang daghan para magbanha kung dunay mga tawo nga mosulod sa akong palibot," pangutana ni Bautista.
Si Bautista nagkanayon migawas lang kining maong isyu batok kaniya sanglit nagkaduol na ang piniliay ug kini maoy gigamit nga isyu mga Cagas.
"Kung dunay warlord sa Davao del Sur, nganong wala niya giimbestigahan nga siya man ang naay authority to investigate?," pahayag ni Bautista.
Ang isyu nga "warlord" gipasangil sa mga Bautista sanglit gikatahapan si Claude sa pagpatay sa amahan ug anak nga sila Isidro Sarmiento Sr. ug Danilo Sarmiento didto sa lungsod sa Malita, Davao del Sur niadtong Mayo 16, 2007.
Si Bautista gidemanda uban sa iyang mga bodyguards nga sila si Tito Alipaopao, Ricky Casin ug Payat Rellon ngadto sa korte ni Isidro Sarmiento Jr., apan gitaktak siya (Bautista) sa kaso sanglit wala siyay partisipasyon sa maong krimen, sigun sa resolusyon nga gipaguwa sa Department of Justice (DoJ) Manila niadtong Pebrero 5, 2008.
"Kung duna koy kalambigitan sa krimen, dili ko magpakaulaw nga moatubang sa katawhan," pahayag ni Bautista kinsa nagpasabot nga hapit siya naaksidente dihang giunhan sila pagpusil sa mga Sarmiento, apan swerte siyang nakadagan paingon sa iyang sakyanan niadtong Mayo 16, 2007.