PATAY ang 26 anyos nga lalaki human nabanggaan ang gimanehong motorsiklo niini kagahapon mga alas 10:00 sa buntag sa Crossing Malasag, Cugman ning siyudad sa Cagayan de Oro.
Giila ang biktima nga mao si Ian Lennon Brillo, ulitawo, taga Lapaz Extension, Lapasan ning siyudad ug maoy nimaneho sa XRM motorsiklo nga kolor itom, nagdala sa temporaryong plaka nga 1036-AV-2870.
Si PO2 Noel Perpetua, Traffic Investigator sa Police Station 6 (PS10) sa Cugman nibutyag sa Sun.Star Superbalita nga nabanggaan ang motorsiklo ni Brillo human kalit lang nga ni u-turn ang taxi nga nagdala og plaka KVT-428 ug gimaneho ni Melinio Batuon, 60, taga NHA-Kauswagan ning siyudad.
Maayong pagkasungag sa motorsiklo hinungdan nga nilagpot si Brillo ug nipilit sa taxi. Nahulog pa kini sa semento hinungdan nga nabunal ang ulo sa biktima.
Ang backrider niini niadtong higayona nga mao si Herbie Napone, 20, minyo nilagpot ug dili makasulti ning panahona.
Dali nga gipangdala sa mga nakasaksi ang biktima sa Capitol University Medical Center (CUMC) apan dead on arrival nga gideklarar sa doktor si Brillo.
Samtang anaa sa state of schock ang backrider gani wala kini masayod kung unsay nahitabo kaniya dihang gipangutana sa polis.
Ang taxi driver nga si Batuon boluntaryong mitahan sa Police Station 3 (PS3) sa Agora human gitulisok sa mga nakasaksi ug gustong pasakitan. Giangkon sa driver ang salaod sa kalit nga pag-u turn. Nasayran gikan kining naghatod sa pasahero sa maong dapit.
Matud ni Perpetua nga wala pa masayod ang hingtungdan ni Brillo sa nahitabo niini samtang gibalhin na sa prisuhan sa PS10 si Batuon sa pagsulat ning balita ug padayon pa ang imbestigasyon.