TULO ka mga kaso sa pagpangdunggab ang natigayon niadtong Sabado ning siyudad sa Cagayan de Oro.

Unang biktima mao si Ryan Idol, 21, ulitawo, taga Osme¤a Extension ning siyudad.

Giluba ang biktima samtang nagbaklay pauli sa puloy-anan niadtong Sabado mga alas 11:00 sa gabii.

Gituohang paregla ang motibo sa pagpangluba human wala maila ang suspetsado ug nasayrang walay gikaaway ang biktima.

Gitabo lamang ang biktima ug deretso nga giluba sa walay igong rason.

Gidala ang biktima sa Northern Mindanao Medical Center (NMMC) nga samaran ang wala nga bahin sa kilid.

Ang kaso giatiman pa saÿPolice Station 2 (PS2) sa Cogon aron pagsikop sa suspetsado.

Samtang sa susamang tambalanan gidala ang ikaduhang biktima nga mao si Roy Taneos, 39, lumad nga taga lungsod sa Talisayan, Misamis Oriental.

Giluba ang biktima kagahapon mga alas 12:30 sa kadlawon sa puloy-anan niini sa Macajalar, Camaman-an ning siyudad.

Nasayran nga adunay nag-away nga silingan sa biktima hinungdan nga iyang gi-aparta ug gibadlong nga dili na mag-away kay silingar raman apan siya hinuon ang giluba hinungdan sa pagkaigo sa likod nga bahin niini.

Ikatulong biktima nga mao si Jhon Batistil ang natripan sa Divisoria ning siyudad kagahapon mga alas 3:55 sa kadlawon.

Susama sa unang biktima, nagbaklay gihapon si Batistil dihang kalit lang gitabo sa wala mailang lalaki ug deretso nga giluba ang wala nga bahin sa bukton.

Human sa pagpangluba gibyaan lamang ang biktima nga nagkadugo hinungdan nga girespondihan sa Police Station 1 (PS1) sa Divisoria ug gidala sa NMMC aron patambalan.