GIPAPRISO sa tulo ka mga anak ang ilang kaugalingon nga amahan human gi-hostage ang ilang 3 anyos nga manghod ug gibugno pa ang ilang inahan niadtong Sabado mga alas 7:45 sa gabii sa Hillside, Lapasan ning siyudad sa Cagayan de Oro.

Nagpatabang sa Police Station 3 (PS3) sa Agora ang magsuong Rosanna Pilapil, Andyson ug Karen, pulos mga minor human sa kagubot nga nahitabo sa ilang balay nga gisugdan sa ilang amahan nga mao si Robinson, 41.

Unang gibun-og ni Robinson ang asawang si Sandra, 37, ug gi-apil pa ang ugangan nga si Normita Besila.

Sa gihimong pakighinabi sa Sun.Star Superbalita ngadto kang SPO1 Edilberto Barela, imbestigador sa kaso sa PS3 gisaysay niini nga hubog kaayo ang suspetsado dihang nahitabo ang insidente.

Giayo og sukmag sa suspetsado ang asawa hinungdan sa grabeng bun-og nga naangkon ug dihang nisuway sa pagtabang ang ugangan nga si Normita gilakip kini og sukmag.

Nanghilak ang mga anak hinungdan nga nakadesisyon ang tulo ka magsuon nga magpatabang sa kapolisan.

Gidala sa kapolisan sa presintuhan si Robinson apan gialsa niini ang 3 anyos nga si Dominic ug dili na buhian.

Buot sa amahan nga ubanon sulod sa prisuhan ang 3 anyos nga anak kung ipadayon ang pagpriso ngadto kaniya.

Pipila usab ka minuto nga wala gihatag ang bata samtang giipit ug wala pa nakuntento gituok pa ang liog hinungdan nga nakakalibang sa kahadlok ug kasakit nga gibati gikan sa pagkaipit ang bata.

Matud ni Barela nga kanunay na niini buhaton ang pagpanukmag kung mahubog ug gani pangsipaon pa ang iyang mga anak.

Ikatulo na usab ka higayon nga gibalhog kini sa prisuhan apan kanunay nga pasayloun sa asawa.

Apan ning panahona, giingong nagdesisyon ang asawa nga pasakaan na kini og kaso labina nga apil ang iyang inahan ang gipasakitan.