GITUOHANG magdasok ang mga mahiligon sa boksing sugod karong alas 5:00 sa hapon sa ALA gym sa Banilad Town Center aron makalili sa abilidad sa duha ka langyawng mga boksidor nga mopakita’g aksyon sa umaabot nga “Bakbakan sa Sinulog” boxing promotion.

Labing seguro, ang giatngan gyud sa mga tawo ning maong public workout mao si American Anthony Villareal, kansang estilo giingong kumbinasyon sa abilidad nila ni Floyd Mayweather Jr. ug Sugar Shane Mosley.

For updates from around the country, follow Sun.Star on Twitter

Matod pa sa trainer ni Villareal nga si Alberto Franco ang depensa ni Villareal sama kang Mayweather unya ang kaagresibo niini sama kang Mosley.

Si Villareal (9-2, 4KOs) modepensa sa iyang WBC Youth Intercontinental flyweight title batok kang ALA boy Milan Melindo (19-0, 5KOs) sa main event sa Bakbakan sa Sinulog karong Enero 14 sa Waterfront Hotel sa Lahug, Cebu City.

Mopakita sab sa iyang abilidad mao si Mexican Cecilio Santos (24-11-3, 14KOs), kinsa maoy makigharong ni AJ “Bazooka” Banal sa co-main event.

Ang duha makig-sparring og pinili nga mga boksidor atol sa public workout.Ang Bakbakan sa Sinulog gitambayayungan pagpasiugda sa ALA Promotions, Smart Sports ug ABC-5.