NAHIMO na nga tradisyon sa mga deboto ni Señor Santo Niño nga sa iyang kapistahan adto sila modangop sa ilang mga paryente nga nia sa dakbayan magpuyo.
Sa hamubo nga panahon sila mopasilong og makigsalo sa pagkaon og katulganan. Ang uban gani magbalon og pagkaon gikan sa probinsya. Duna say magdala og bugas og humay nga pilit.
Sa ilang paryente nga gisak-an, katabang sab sila sa mga gimbuhaton sa balay ilabi na niadtong magkumbera. Kini nga praktis hangtod karon nagpabilin pang buhi ilabi na niadtong makamao pa nga mobati sa ilang mga paryente gikan sa bukid.
Hinuon di tanan nga gikan sa probinsya ang modangop sa ilang mga paryente sa syudad. Namasangil sila nga nausab na ang batasan, ug kaayo og tinagdan. Sa laktod way ganang mopakatulog ug mopakaon.
Mura ba og bug-at kaayo nila nga naay paryente nga magsamok-samok sa ilang balay. Mao nga ang ubang mamistahay adto na lang dangop sa aseras og sa gitukod nga tent city sa kagamhanan sa dakbayan sa Sugbo.
Mosusi ka sa listahan sa mga mopahulay sa tent city, makita nimo didto nga ang ilang mga apelyedo daghan kaayo dinhi sa Sugbo. Ang pangutana nganong wa may nagpakabana ug pasaka nila.
Posible nga rason mao, wa sila makaila. O kadtong mga rason nga akong gihisgutan sa unahan.
DANGPANAN
Ang Police Regional Office-7 pinaagi sa ilang pangulo nga si C/Supt. Lani-o Nerez nakasabot ning sitwasyon. Mao nga mapasalamaton kaayo ko kang Gen. Nerez sa iyang pagsanong sa hangyo sa Nadela Clan pinaagi kang Agaw Mercy Nadela Gomez nga makabutang og gamay nga pasilunganan alang sa mga kaliwat nga Nadela nga mamista sa Senyor.
Kini mahimutang unya atbang sa Camp Sergio Osmeña Sr. sa Osmeña Blvd. sa dakbayan sa Sugbo. Ang maong dapit tawgon og Dangpanan.
Sa adlaw’ng Domingo atol sa Sinulog Parade, gikan sa buntag hangtod na sa gabii, ang mga sakop sa Nadela Clan nga gustong magpatabang sa uban pa nilang tuyo dinhi sa Sugbo, atong gidasig pagbisita sa maong Dangpanan. Naa sab tay courtesy booth aron di na magsigi og abiba sa dala nga bag ang mga kaliwat nga mamista.
Usa ka Internet connection ang ibutang sab didto. Kini alang sa aton mga kaliwat nga di makapamista mahimong ipaagi sa internet ang ilang pangumusta ug pangutana labot sa fiesta.
Sa mga agaw nako nga gustong magpakisayod o may ipuno pa nga ideya labot ning maong proyekto palihug sa pagtext sa numero 0920-9613488. Pit Senyor!