IPALANOG ang mga pakpak, ipakatap ang pagsaulog. Ay, pasayloa na lang intawon kon labyog ra kaayo ang haguros ug daguok sa hangin niining lindog, gaunay pagpalanog sa kaugalingong tuktogaok. Pwera buyag, dalaygon ug angay gyod ilhon sa tibuok kalibotan ang mga pasundayag natong Sugboanon.

Kon di ka motuo, aw, lagmit wala ka’y kalibotan sa kisaw bisan asang dapit sa planeta sukad nisayaw ang mga binilanggo sa Cebu Provincial Detention and Rehabilitation Center (CPDRC).

Dinuyogan sa tukar nga “Thriller,” ila gyong nalingaw ug nahugyaw ang minilyon nga tumatan-aw sa YouTube. Gihungopan gihapon, matag karon ug unya, ang ilang mga palabas. Bisan pa’g kabos sila sa kagawasan, nilampos gihapon sila paghatag og pasidungog sa Bisdak nga kaliwat.

For updates from around the country, follow Sun.Star on Twitter

Gapaantog gihapon sila sa ilang kabantog, padayong nangharos.

 Gani, gikataho bag-ohay lang nga gigahinan og duha ka panid ang ilang gipakitang gimik sa bag-ong libro nga “The Official Michael Jackson Opus.”

Ay, bisa’g pila’y pusta, di gyod papildi ang Bisdak. Ug samtang wa’y kutas ug pinabundak karon ang kasikas sa lumad natong paghalad ug pangilin—Pit Senyor!—magpasutoy pod ta pagtaghoy ug paglaom nga kita mag-amping sa atong mga kabiling huni alang sa buhi nga paghandom, pag-ila, ug pagpasidungog sa kaugalingong kultura kun budaya.

Dayag nga dakong gasa alang sa atong kaliwat ang pag-abli ugma puhon, sigon sa nasayran niadtong Desyembre, sa usa ka museyo nga gitawag og “Tipiganan sa mga Kanta ug Kinaiyang Sugbuanon.”

Gipasiugdahan sa banay nga Gullas, kining maong museyo dako gyod og mabuhat isip pinuy-anan sa mga kuyaw-hikalimtan nga mga mugna sa mga lumad natong musikero ingon man ang ilang kahimananan ug uban pang handomanan.  

Pinaagi niini, mahimong mapahimuslan pa sa mga bag-ong tubo ug mga kaliwatan puhon ang mga mahunihong bahandi sa mga Bisdak.

Usa pod kini ka pag-aghat sa mga batan-ong mga musikero sa Sugbo aron sila modayon ug magpadayon pagkaplag, pagtikad, ug pagpalambo sa tinuod nilang tingog.

Niining higayona, atong pamatud-an nga ang atong kaliwat samtang gapahiuyon ta sa awit duyog sa sayaw sa Sinulog—bisan pa’g antras-abante—dili magpaulahi.

(geemyko@gmail.com)