MAKAPASAGMUYO ug kiwang gyud kaayo paminawon kining gibuhat sa taga Cebu Pacific Airlines nga mao ang wa pagpasakay sa duha ka special children sa niaging semana.

Human mabalita sa radyo, telebisyon ug mantalaan, daling nakapangayo og pasaylo ang management sa maong airlines kalabot sa maong hitabo. Gani aron paghupay sa masakit nga kasinatian sa mga ningtungdan, nitanyag gilayon og libre nga biyahi ang management ngadto sa sa pamilya sa duha ka special children.

For updates from around the country, follow Sun.Star on Twitter

Gawas sa paghupay, damage control ang gihimo sa management aron di na moreklamo pa ang hingtungdan ug malikayan na ang pagsigi og tagawtaw sa mga media. Pero bisan unsa pay buhaton sa maong airlines company, nahimo na ang danyos sa di makiangayon nga binuhatan.

Ang gusto sa publiko nga mahibaw-an kon si kinsa man ang nagbuot nga dili pasakyon sa ilang ayroplano ang mga special children, butang nga sukwahi kaayo sa usa sa katuyoan nga mao ang pagsilbi usab sa publiko.

Gusto usab natong mahibaw-an kon nalatid ba gyud kini sa ilang palisiya o wala. Dili usab kalikayan ang mga pagduda nga kadto adunay pagtugot sa ilang labaw kay kinsa man nga ultimo nga magbuotbuot sa pagbuhat sa ingon.

Ubos sa pag-awhag sa gobiyerno nga hatagan og way kalahian nga pagtagad ang mga special children, pipila ka mga kompaniya ang mihangop ug misanong miini ilabi kadtong anaa sa negusyong pagserbisyo sa publiko. Apan subo palandungon nga aduna usay pipila ka mga buhatan nga wa manumbaling niini.