NANAMBONG si Juaning sa bentana sa ilang balay usa niana ka hapon. Iyang nakit-an si Castor nga nanghugas sa iyang mga tiil sa usa ka puso. Iya ning nadunggan nga nagyawyaw nga iyang patak-umon ang mga kunsintidor.

Human sa iyang pagpanghugas, niadto si Castor sa karsada. Daling nikanaog si Juaning kay nakulbaan siya. Iyang nakit-an ang iyang bana nga nagsandig sa punoan sa mangga mao nga iyang giduol.

For updates from around the country, follow Sun.Star on Twitter

Iyang gihangyo ang iyang bana nga Genny nga manguli na sila kay nag wild na sab si Castor. Iyang nasiplatan si Neil, anak ni Castor, nga nagbarog sa gate nga nagtan-aw kanila.

Pagkataudtaud, si Neil niadto sa usa sa mga gi-park nga awto, nibukas niini ug nikuha sa usa ka pusil gikan sa sud. Niduol ang amahan ug nikuha sa pusil. Apan iya ra sab ning gihatag pagbalik kang Neil.

Iyang nadunggan si Castor nga nimando sa iyang anak nga “banatan” na sila. Giibot ni Neil ang pusil gikan sa iyang hawak ug gipunting sila si Juaning ug Genny.

Napaatras sila dihang nagpabuto og kaduha si Neil. Nangatumba sila si Juaning ug Genny. Nadat-ugan siya sa iyang bana.

Pagkahuman, nisulti si Genny kang Juaning nga naigo siya.

Dali niyang gidala ang iyang bana sa ospital, apan namatay kini bisan naoperahan.

Samtang si Neil niangkon nga nakakita siyag pusil sa taxi nga iyaha sa iyang amahan. Iya ning gitakin samtang diha siya atubangan sa gate sa ilang compound.

Iya ning giibot aron unta tan-awon, apan kalit kining nibuto dihang nakablitan niyag makaduha. Matod niya nga aksidenteng naigo si Genny. Atol sa mao nga hitabo, nakighagwa hagwa siya sa iyang mga manghod nga iyang gikuha gikan pa sa tunghaan.

Matod niya nga wa gyud siya makakita kang Genny ug Juaning nga diha sa punoan sa usa ka mangga.

Dihang naigo na si Genny, gikuha gikan kaniya sa iyang amahan ang pusil. Matod niya nga wa sila maglayog.

Sa ato pa, buot niyang ipalutaw nga aksidente, di tinuyo, ang pagpusil kang Genny. Kon tinuod man, unsa man nga kaso ang angay ipasaka batok kang Neil, murder o homicide? Ngano man?