MGA Sugbuanong supporters ug volunteers alang kang Sen. Manny Villar nagkaandam og kadaghan karong nagsugod na ang election period.
kini maoy rason nga malaumon ug masaligon ang senador nga makakuha gyud og dakong suporta sa mga Sugbuanon bisan pa man sa kasamtangan wa pay local nga opisyal dinhi sa Sugbo ang nisuporta sa Nacionalista Party partikular na sa iyang kandidatura.
Hinuon gipadayag niini nga karong adlawa ipahigayon ang pormal nga pakig-alayon sa local nga partidong Alayon ni Cebu 1st district Cong. Eduardo Gullas ug sa NP.
Matod ni Villar nga bisan kon si Gov. Gwen Garcia nipaluyo na kang Gilbert Teodoro, matod ni Villar nga mag-focus nalang usab sila sa mga local nga kandidato sama sa mga mayor, konsehal ug mga kongresista ug sa ubang mga civic organization.
Kon di man motapon sa ilang partido ang mga local nga opisyal, matod ni Villar nga posibling ila lang kining sagupon.
Matod sa senador nga usa lang ka factor ang suporta sa usa ka local nga opisyal apan sa kinauwahian ang gusto sa matag botante mao gihapoy mopatigbabaw maong siya masaligon nga bisan kon way suporta sa mga local nga opisyal, suportahan siya sa mga botanteng nituo kaniya.
Gani usa sa mga pruweba nga nagkalig-on ang kandidatura ni Villar mao ang uwahing resulta sa survey diin kini nagpabiling naa sa ikaduhang puwesto sunod ni Sen.Noynoy Aquino apan nagkagamay nalang ang lead.
“Mula noong Setyembre, nakita naman naming na pababa nang pababa ang lead. Wala pa namang survey nga tumataas,” nagkanayon si Villar dihang nahinabi sa mga tigbalita.
Ang pagdaghan sa mga supporters sa NP gipamatud-an sa gihimong mass oath-taking kagahapon sa gibanabanang kapin usa ka libong mga miyembro sa Higala ni Manny Villar Movement gikan sa unang tulo ka mga distrito sa Sugbo ug sa kahugpongan sa mga Cebu Chinese businessmen.
“Natutuwa ako sa patuloy na pagdami nang mga suporta. Mataas naman ang rating ko sa Visayas ever since na pumasok ako sa politika,”dugang ni Villar.
Matod ni Dumanjug mayor Cesar Baricuatro, ang pangulo sa NP dinhi sa Sugbo, nga ang unang tulo ka mga distrito lang una ang ilang gipapanumpa ug isunod ra ang nahibiling tulo ka mga distrito nga mao ang 4th, 5th ug 6th district.
“Gituyo ni namo para di maghuot dinhi kay gusto namo nga comfortable ang tanan,” pasabot ni Baricuatro.
IYa sang gibutyag nga duna say laing himuong oath-taking sa mga local na mga opisyal ug kandidato nga magpasakop sa NP ug kini maoy rason nganong way mga local nga opisyal ang nakit-an sa kalihukan kagahapon.
Apan wa una ibutyag ni Baricuatro kon kinsa sa mga local nga opisyal ang motapon sa ilang partido.
Wa pa hinuoy schedule kon kanus-a ang sunod nga oath-taking.
Apil sa nitambong oath-taking mao ang mga senatoriable sa NP nga naglakip nila ni Cong. Bongbong Marcos, kanhi Kongresista Gilbert Remulla, Sen. Pia Cayetano ug Atty. Adel Tamano.