MGA duha ka adlaw sa wa pa moepekto ang ban sa pagbalhin sa civil service officials, ang Camp Crame nimando na sa pagrelibo sa labing minos upat ka dagkong mga opisyal sa kapulisan sa rehiyon.

Lakip sa mga opisyal nga ibalhin mao sila si Cebu Provincial Police director Jesus Gaquing Mandaue City Police Chief Orlando Ualat.

For updates from around the country, follow Sun.Star on Twitter

Si Regional Logistics Chief Erson Digal ang gitakdang mohulip kang Gaquing samtang si Community Relations Chief Noel Gillamac maoy mohulip kang Ualat.

Si Gaquing niingon nga ang pagrelibo kaniya magsugod unta niadtong Biyernes apan nasayod lang siya niini kagahapon sa buntag.

Nagtuo siyang kini tungod sa naandang lahugay nga ipahigayon sa di pa ang election period.

Ingon man, ang gitakdang pagretiro niya sa Mayo 22 hayan nakaingon sab, aron malikayang dunay vacuum sa liderato sa CPPO.

Niangkon siyang wa pa siya masayod kon mo-report pa siya sa CCPO karong adlawa.

“I still have to ask for further instructions,” matod ni Gaquing sa Sun.Star Cebu.

Samtang si Ualat, sa iyang bahin, niingon nga nakadungog na siyang ibalhin siya gikan sa Mandaue city sukad pa niadtong Sabado, apan wa pa siya makakita sa mando.

Si Negros Oriental Provincial Police Chief Augusto Marquez ilakip sab unta sa relibuhan.

Apan human mapirmahi niadtong Biyernes ang pagrelibo kaniya, usa ka opisyal ang nihangyong ipabilin siya, matod niya sa interbyu sa Sun.Star Cebu. (MEA sa Sun.Star Cebu)