SI boxing hero Manny Pacquiao gidapit sa pagtambong sa Sinulog grand parade finale unya sa Dominggo, apan si Mayor Tomas Osmeña naghuwat pa sa iyang kompirmasyon.
Kini samtang iyang gihangyo ang publiko kagahapon nga moaguwanta sa grabeng kahuot sa trapiko tungod sa Sinulog.
“Naa koy advisory karong Dominggo. It can be expected nga dili molihok ang traffic until sa kaadlawon. Planohon unsay himuon kanang panahona,” matod niya.
“Ayaw gamita ang kotse kay dili masulod sa dalan. Inig-Lunes daghang masuko tungod sa traffic. Agwanta lang ta and enjoy,” matod sa mayor.
Nipahibawo siya niini atoll sa gipunsisukan nga Sinulog sa Kabataan sa Dakbayan kagahapon sa hapon,nga nakaingon sab sa heavy traffic sa downtown area.
Matod sab sa mayor nga iyang gidapit si Pacquiao, pinaagi Cebuano boxing manager Wakee Salud, aron moapil sa grand parade ug mokanta alang sa mga Sugboanon.
Suta niingon nga tungod sa pagka kanselar sa away nila ni Pacquiao ug Mayweather, ang boxing superstar hayan dunay higayon sa paglingaw sa katawhan pinaagi sa iyang pag-awit.
Hinuon matod niya nga wa pa siya makadawat og tubag.
“Maghulat lang ta. Mahimo man mo-anhi siya sa last minute,” matod ni Osmeña.
Gawas sa boxing, si Pacquaio kahibawo sab mokanta ug dunay siyay album niini.
Atol sa ika-61 nga adlaw nga natawhan sa mayor niadtong Hulyo sa miaging tuig, si Pacquiao nianhi dinhi ug niawit og pipila ka mga kanta alang kaniya, nga nakalingaw sa mga tawo.
“He can sing whatever he wants,” matod sa mayor dihang gipangutana kon unsa nga kanta ang iyang ganahan nga kantahon ni Pacquiao.
Kay gitakda man nga ang Sinulog karon maoy labing bongga kay ika-30 nga anibersaryo, ang mayor nag-isip nga ang presensya ni Pacquiao makadugang pa sa kaalegre.