HALOS tanan nga mahiligon sa boksing gisayangan sa pagkabugha sa Floyd vs Manny fight of the century. Giluwatan sa duha ka kampo, ang Golden Boy Promotions ni Mayweather ug Top Rank ni Pacquiao, human sa ilang panagtigom nga wala sila magkauyon sa drug testing protocol. Kung wa ko masayop, buot sa kampo ni Mayweather nga kuhaan sila'g dugo bisan unsang orasa nga gusto sa mga opisyal bisan hapit na ang adlaw sa boksing.

Miuyon si Manny nga makuhaan og dugo subay sa regulasyon sa Nevada Boxing Board nga maoy mahukmanon sa nabughang away. Niguwa man god ang isyu gikan sa kampo ni Mayweather ilabi na gikan sa nagbulabula nga baba sa iyang amahan nga nigamit og medisina si Manny aron malig-on. Mao daw kini ang sekreto sa kusog sa Pambansang Kamao busa nakuha niini ang 7 ka bakos sa 7 weight levels.

Siyempre napikal ang kampo ni Pacquiao ug ni-demand nga mohimo og public apology ug bakwion ang iyang gisulti nga way basihanan.

Gawas sa mga mahiligon sa boksing, naguol usab ang mga negosyante tungod kay mokabat og kapin $200 million nga kita unta sa HBO PPV ang mabasura.

Daghan sab nga mga negosyo nga kalambigit sa sports ang way kita tungod sa panghitabo.

Dili na pod madayon ang fundraising sa among San Alfonso Parish ug sa mga charitable organizations nga na'g PPV sab matag away ni Manny.

Unsa kaha ang hinungdan nganong di madayon ang away? Matud pa ni Mike Koncz, ang Canadian adviser sa Team Pacquiao nga para niya nahadlok si Floyd nga makigharong kang Manny. Sa sinugdan pa lamang, may nagduda siya nga mikakak ang Amerikanong boksingero kay basi'g si Manny pa ang makaguba sa iyang no defeat record hangtud nga siya miretiro. Mora'g misalir ang pag-ampo ni Nanay Dionesia nga di na niya gustong magboksing si Manny. Atoa na lang bantayan ang sunod nga balita mahitungod niini.

Taas ang populasyon

Gibanabanaang mokabat na'g 94 milyon ang tawo sa Pilipinas sa katapusan sa 2010. Niulbo na usab ang kaspa sa Popcom ug Department of Health kay mora'g wa silay nahimo sa pagpakunhod sa populasyon sa Pinoy.

Segun sa giluwatang pamahayag ni assistant regional Doctor Estrera sa DOH XI nga kulang gayud ang suporta sa nasudnong kagamhanan kabahin sa populasyon.

Nanghinaut siya nga ang mosunod nga administrasyon may klaro nang direksyon ug aksyon kabahin sa family planning program ug ubang programa sa PopCom.

Buot sa mga health, women ug child-rights advocates nga mapasa na ang Reproductive Health Bill nga magprotekta sa mga kababayen-an, pagdugang sa serbisyong sosyal ug paghatag sa magtiayon sa katungod sa pagpili sa paagi sa pagdumala sa ilang sekswalidad ug pamilya.

Sa laing bahin sakto sab ang simbahang Katoliko nga dili magamit ang balaod sa pagtugot sa abortion ug ubang immoral nga kalihukan nga sukwahi sa sumbanan ug doktrina sa simbahan.

Dugang pa nila nga dili problema ang gidaghanon sa tawo kondili ang saktong pag-apod-apod sa rekursos sa nasud, ang di maayong pagdumala sa kagamhanan ug ang naghitak nga kurapsyon.