DUHA ka mga mekaniko ang gidemanda sa korte gumikan kay sila ang mga suspetsado sa pagpanguha sa spare parts sa mga sakyanan sa ilang gialagaran nga kompanya niadtong Enero 7, 2010.
Nag-atubang og kasong qualified theft mao sila Jonel Lagare, 20, ulitawo, lumad nga taga Upper Siocon, Compostela, Comval Province, nagpuyo sa Kilometro 13, Barangay Sasa ug Rex Fernandez, 22, minyo, lumad nga Marbel, South Cotabato ug nagpuyo sa Purok 3, San Vicente, Barangay Tigatto.
Ang kaso nila Lagare ug Fernandez nakadoket sa IS # INQ-A-000354 didto sa City Prosecution Office, Ecoland.
Ang duha gikiha sa tagdumala sa Seoul Motors Trading and Transport Corporation sa Buhangin tungod sa giingong pagpangawat.
Kahinumdoman, gisikop sa kapulisan ang duha human sila gireklamo ni Rhea Mae Escabarte, empleyado sa Seoul Motors Corporation.
Si Escabarte midangop sa Buhangin Police Station aron ipahibalo nga gisikop si Lagare sa ilang shop-in-charge nga si Vicente Alcain sa alas 9:47 sa gabii niadtong Huwebes.
Si Lagare gisikop tungod kay nasakpan sa akto nga nanguha og mga spare parts sa sakyanan mao nga miresponde ang kapulisan nga gipangulohan ni PO3 Manlatican.
Sa gihimong pagsukit-sukit sa kapulisan, nasayran nga kauban ni Lagare si Fernandez sa paghimo sa maong krimen mao nga gisikop ang naulahi didto sa Blk. 4, Lot 30, Roseville Subdivison, Lanang.
Nabawi sa kapulisan ang duha ka transmission sa sakyanan nga Avella nga nagkantidad og P10,000.00; lima ka transmission sa Starex nga nagkantidad og P200,000.00 ug usa ka yantas sa Starex nga nagkantidad og P3,000.00 nga misumada sa kantidad og P213,000.00.
Naghulat karon ang duha sa sunod nga mando sa korte bahin sa ilang kaso. (AD)