MGA otoridad ug lokal nga opisyal gihangyo sa pagpitol sa mga botika nga dili mohatag og 20% nga diskuwento sa mga tambal nga paliton sa mga Senior Citizens, lakip na kadtong may kakulian sa lawas.

Gibutyag ni Arturo Sumilang, molupyo sa siyudad sa Cotabato, nagpangidaron og 68 anyos nga grabe kagahi sa pagtuman sa balaud ang mga tindahan og tambal sa Cotabato City ug mga kasikbit lugar.

Gibasol ni Sumilang ang kagamhanan sa siyudad tungod kay matud pa niya napakyas kini sa pagpatuman sa balaod nga naghatag og pabor sa mga katiguwangan ug mga tawong may deperensiya sa lawas.

Dugang ni Sumilang nga maayo ang tumong sa balaod nga maghatag og kaayuhan sa mga edaran ug sa mga disabled apan wala'y umoy ang mga opisyal sa gobyerno sa pagpatuman niini.

Niya pa, nga ang kakuwang sa kadasig sa mga lider sa kagamhanan maoy nagtukmod sa kaalautan sa mga edaran.

Nagtuo si Sumilang nga mohumok ra ang mga opisyal sa maong dakbayan sa pagpatuman sa balaod kun isumbong ngadto kang Pangulong Gloria Macapagal Arroyo. (Edgardo Fuerzas)