NAHIABOT na sa probinsiya sa Maguindanao ang puwersa sa 45th Infantry Battalion (IB) sa Philippine Army gikan sa Isabela.

Sila maoy moabag sa militar ug kapulisan sa pagpatunhay sa kalinaw ug maglutos sa mga sakop sa Private Armed Groups (Pags) nga gitumbok nga nalambigit sa nilabay nga masaker.

Ang 45th IB, gidestino sa Mamasapano isip hulip sa 75th Infantry Battalion sa Philippine Army ug 64th IB nga gibalhin sa Lanao Del Sur. Apan ang katawhan sa Maguindanao nabalaka niini.

Sumala nila nga dunay laing tumong ang gobyerno sa pagpakatag og ubay-ubay ka mga puwersa sa militar aron sa paglutos sa mga rebeldeng grupo.

Panaghap nila nga posibleng makamugna kini og laing senaryo nga dili mahinayon ang piniliay aron magpabilin sa puwesto si Pangulong Gloria Macapagal Arroyo.

Namatikdan sab sa Maguindanao ang padayong pagbahis-bahis sa mga tropa sa MILF nga daw nangandam sa dakong gubat.

Apan giklaro ni 6th ID Chief Major General Anthony Alcantara nga walay angay nga kabalak-an ang katawhan gumikan kay ang ilang gipakatag nga mga sundalo kabahin sa seguridad sa umaabot nga eleksiyon ug ang gipalig-on nga operasyon batok sa Pags walay labot ang MILF nga padayong nakighinabi sa kagamhanan sa malinawong pamaagi.(Edgardo Fuerzas)