MURAG gigitik si Davao del Sur Governor Douglas Cagas kinsa mibahakhak sa pasangil ni kanhi 2nd District Representative Claude Bautista, nga siya maoy dunay daghang bodyguards atol sa usa ka press conference didto sa siyudad sa Davao.

Pinaagi sa text message nitubag si Cagas dinhi sa Sun.Star Superbalita kalabot sa pahayag ni Bautista human siya gipatapsingan sa anak sa gobernador nga si 1st District Representative Marc Douglas Cagas IV, niadtong Christmas party sa Davao del Sur Provincial Police Office (DDSPPO).

Ang kongresista nagpahibawo sa kapulisan nga adunay 'warlord' sa Davao del Sur ug mihangyo nga ipabungkag ang mga private armies.

Matod ni Kongresista Cagas nga di siya buot nga mahisama sa nahitabo didto sa Maguindanao ang Davao del Sur karong piniliay, diin 57 ka mga tawo ang gipatay, lakip na ang mga personahe sa media.

Apan, matod ni Bautista nga duha lang ang iyang security personnel ug si Cagas maoy nagbaton og daghang bodyguards gawas nga matod pa adunay outpost ug closed circuit television (CCTV) camera ang balay niini.

"Natingala ko sa ilang giingon nga warlordism. Warlord kuno ko. Kinsa may warlord namo? Duha lang ang akong security personnel nga pulis," kini ang pamahayag ni kanhi Malita Mayor Claude Bautista kinsa maoy gipatapsingan sa mga atake sa kongresista nga nagbaton og mga armado sa ilang lugar atol sa gihimong press conference niadtong Sabado didto sa Marco Polo Hotel.

"Ang mga tawo sa Digos ug Malita ang atong pasultihon. Wala nako'y bodyguards bisan usa sukad kagahapon (Dominggo)," pag-klaro ni Cagas.

Matud ni Bautista nga gwardiya lang sa balay ang iyang bantay ug mga binuhing manok lamang niini ang makahimo og alarma sa taknang dunay mosulod nga tawo sa ilang balay.

"Sulayi Don og adto sa among balay sa Digos ug sa balay ni Claude sa Malita ug Davao aron ikaw mismo maka-testigo," hagit ni Cagas ning tigsuwat.

Bahin sa akusasyon ni Bautista nganong wa si Cagas nagpasiugda og imbestigasyon, ang gobernador nagpahayag nga iya na kini gitunol sa pulis.

"Gi-report na namo ma sa pulis. Dili ako'y mag-imbistigar, ang pulis. Gidiskurso na kana ni Marc sa kongreso", sumala ni Cagas.

Nagsugod ang subling panagbingkil sa duha ka mga dagkong pulitiko sa lalawigan human subling makigtakos kaniya si Bautista pagka-gobernador.

Nahitabo sab ang isyung warlord human nga gipasangil kang Bautista ang pagpatay sa amahan ug anak nga sila Isidro Sarmiento Sr. ug Danilo Sarmiento didto sa lungsod sa Malita, Davao del Sur niadtong Mayo 16, 2007.

Si Bautista gidemanda uban sa iyang mga bodyguards nga sila si Tito Alipaopao, Ricky Casin ug Payat Rellon ngadto sa korte ni Isidro Sarmiento Jr., apan gitaktak siya (Bautista) sa kaso sanglit wala siyay partisipasyon sa maong krimen, sigun sa resolusyon nga gipaguwa sa Department of Justice Manila niadtong Pebrero 5, 2008.

Giklaro ni Bautista nga wa siya'y kalambigitan sa nahitabo atubangan sa Davao media.

"Kung duna koy kalambigitan sa krimen, dili ko magpakaulaw nga moatubang sa katawhan," pahayag ni Bautista kinsa nagpasabot nga hapit siya naaksidente dihang giunhan sila pagpusil sa mga Sarmiento, apan swerte siyang nakadagan paingon sa iyang sakyanan niadtong Mayo 16, 2007. (Dondon Dinoy)