10 angol sa bangga

NAPULO ka mga tawo ang nangaangol dihang nabangga ang usa ka bus sa Ceres ngadto sa punoan sa mangga alas 11 sa buntag kagahapon sa Barangay Puente, lungsod sa Carmen, amihanang Sugbo.

Apil sa naangol ang nagmaneho sa bus nga si Edilberto Libardo, 48, minyo, nagpuyo sa Dunggo-an, dakbayan sa Danao nga napangos ang walang tiil.

Ang mga pasahero nga nangaangol mao sila si Glicerio Sarvida, 53, taga Guinsay, Danao City; Eric Toring, 41, taga Barangay Bulwang, Tuburan; asawa niini nga si Charlotte, 41 ug ang ilang anak nga si Harvey John, 19; Editha Seno, 55, taga Barangay Cabangahan, Sogod; Maria Dolores Montebon, 30, Barangay Putat, Tuburan; Analyn Tungal, 30, taga Barangay Bulwang, Tuburan; Jodelyn Alivio, 18, taga Barangay Bulwang, Tuburan; ug Tata Cole, 39, taga lungsod sa Tabuelan, Sugbo.

Si PO2 Ever Villacarlos, traffic investigator sa Carmen Police Station, niingon nga nisugilon si Libardo nga pag-abot nila sa Barangay Puente, kalit dunay nipaka sa ilawom sa bus dapit sa makina ug wa na siya makapugong sa manobela hinungdan nga nisarasay ang bus paingon sa kilid ug nabangga sa punoan sa mangga.

“Maayo gani kay way tawo sa mangga ug wa sad sila mabangga og balay,” nagkanayon si Villacarlos sa Sun.Star Superbalita.

Ang mga nangaangol nga kadaghanan nakaangkon og mga pangos, garas ug bukol sa nagkadaiyang bahin sa ilang lawas ang gidala sa provincial hospital sa dakbayan sa Danao aron matambalan.

Si Libardo human matambalan, boluntaryo nga nitahan sa iyang kaugalingon sa kapulisan sa Carmen.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph