MAG-ABOT na karong alas 11:00 sa buntag ang nanag-unang mga protagonista sa “Bakbakan sa Sinulog” boxing promotion sa usa ka press conference sa Agean Room sa Waterfront Hotel sa Lahug, Cebu City.
Sa main event sa promosyon, nga gikatakda karong Huwebes sa Waterfront Grand Ballroom, magsangka sila si ALA boy Milan Melindo (19-0, 5KOs) ug American Anthony Villareal (9-2, 4KOs).
Ning awaya, mosaka og timbang si Melindo ug suwayan niya’g ilog ang World Boxing Council (WBC) Youth Intercontinental flyweight title ni Villareal, kinsa giingong adunay abilidad nga sama nila ni Floyd Mayweather Jr. ug Sugar Shane Mosley.
Sa co-main event, magsangka sila si ALA boy AJ “Bazooka” Banal (20-1-1, 16KOs) ug Mexican Cecilio Santos (24-11-3, 14KOs) sa usa ka non-title bout.
Wala man tuoy titulo nga ilugan apan importante kaayo kining awaya hilabi na kang Banal kay mao kini magsilbi niyang agianan aron makakuha og mas dagko pang mga away sa umaabot.
Laing angayang atngan nga mga away sa promosyon mao ang tali nila ni ALA boy James Bacon batok That Thitichon Singwangcha ug Larry Canillas batok Thai Petch Twins Gym.
Magsangka sab sila si Jojo Entor batok Romnick Hoybia ug Jonel Gadapan batok Jasyon Inso. Ang promosyon gitambayayungan pagpasiugda sa ALA Promotions, Smart Sports ug ABC-5.