KIHA. Nadutlan si Mayor Tomas Osmeña sa mga atake ni negosyante Atan Guardo, nga iyang kaatbang sa pagka kongresista sa north district sa dakbayan sa Sugbo, kay iya man ikiha og libelo.
Nagpasabut lang kini nga naapektohan ang kandidatora ni Mayor Tomas pagka kongresista sa north district batok ni Atan kay di na man moundang og gukod si mayor ni negosyante Atan.
Gani ang angayan unta nga mokiha batok ni Mayor Tomas mao si Atan tungod kay gigamit ni Mayor Tomas ang iyang gahum ngan mayor sa pagpagampanya ug paggamit sa kwarta sa dakbayan sa iyang kandidatora.
Mireklamo si Atan sa dihang gibaharan si Cora Lim, ang iyang lider sa Calamba, nga dili pahatagon og mga hinabang gikan ni Atan ngadto sa mga biktima sa sunog diha sa Calamba.
Gipakapinan pa gyud nga ang mga paryente ni Cora Lim nga nagtrabaho sa barangay matangtang sa trabaho kon ipadayon ni Lim ang pagpanghatag og hinabang niadtong Sabado.
Sa miaging tuig, ang mga basketball boards nga gidonar ni Atan sa mga kabarangayan gipatangtang ni Mayor Tomas ug giilisan sa board nga dunay tatak sa city hall, iyang ngan ug ni Bise Mayor Mike Rama.
Mireklamo usab si Atan nga di na siya pasudlon sa gymnasium sa mga barangay diha sa north district labina sa torneyo sa basketball nga iyang gipasiugdahan.
Pagkaluoy ni Atan. Ang iyang kontra sa pulitika ang kwartang gigamit sa dakbayan o kwarta sa katawhan samtang ang iyang gigasto alang sa iyang kampanya gikan sa iyang bulsa.
Gawas nga kwarta sa dakbayan ang gigamit ni Mayor Tomas sa iyang pangampanya, gigamitan pa gyud niya og pwersa de kasahos intawon si Atan. Mao bag-ong klasse sa terorismo way gamitay og armas.
Kon atong mahinumduman nagpasiatab pa gani si Mayor Tomas nga magpakanaog siyag P600 milyunes nga budget nga matud pa niya “political fund” alang sa iyang kampanya pagka kongresista diha sa north district.
Ang ato sad nga mga kaigsoonan nga nagkalisud bisag tingale supak sa ilang kabubut-on sa pagdawat sa kwarta o hinabang gikan sa dakbayan ila na lang dawaton aron mogaan ang ilang inadlaw nga panginabuhi.
Mao ni nakahiwi sa atong balaod sa piliay dinhis atong nasud.
Dili patag ang away sa mga kandidato labina sa oposisyon. Ang gibuhat ni Mayor Tomas dili lang kay usa ka salaod, nakasupak pa gyud kini sa atong moralidad.
Apan tan-awa kon duna bay gibuhat o reaksyon ang opisina sa Ombudsman sa gipanghambog ni Mayor Tomas nga P600 milyunes nga “political fund”. Wa pa gyud ko kadungog nga ipaimbestigar sa Ombudsman ang gipanghambog ni Mayor Tomas.
Naay atong Ombudsman nga mogukod sa mga hiwing binuhatan sa atong mga opisyales sa kagamahan apan way mga itlog. Ang Commission on Audit (COA) nga maoy moproteher sa kwarta sa kagamhanan apan hadlokan labina sa mga pulitikong dunay koneksyon sa Malacañang.
Gigamit lang ni Mayor Tomas ang ngan sa city hall nga iya kunuhay protektahan sa iyang kihang libelo batok ni Atan. Hinumdumi Mayor Tomas nga kon ang panghitabo tinuod wa nay kasong libelo.
Si Atan ang angayan mokiha ni Mayor Tomas ug sa iyang mga soldados kay ang ilang gibuhat nakasupak sa atong balaod ug moralidad. Ang kihang libelo batok ni Atan nga ipasaka ni Mayor Tomas usa lang ni ka stratehiya sa pulitika aron matak-opan ang baba ni Atan.