HUMAN sa usa ka gasolinahan, usa ka tindahan ang gitulis sa dakbayan sa Mandaue sud lang ning semanaha.
Nakuha sa upat ka mga tulisan ang halin nga sobra pa sa P15, 000 sa Remee’s General Merchandise niadtong Huwebes sa gabii.
Ang mga tulisan nga nagsakay gihapon og duha ka mga Honda XRM nga motorsiklo maoy gitumbok nga mitulis sa Perton Gas Station sa Brgy. Subangdaku niadtong Masrtes.
Matod ni SPO2 Marcos Noval sa Theft and Robbery Section (TRS) sa Mandaue City Police Office (MCPO) nga ilang nakita pinaagi sa close circuit television (CCTV) footage sa tindahan nga ang mga upat ka wa pa mailhing tulisan mao usay ningtulis sa gasolinahan.
Kini human gipakita mismo sa tag- iya sa tindahan ang CCTV footage ngadto kanila.
Si Noval nagkanayon nga usa ra ka grupo ang nitulis sa tindahan nga maoy usay nitulis sa duha ka mga sanga sa Petron Gas Station sud lang sa duha ka mga semana ning buwana.
Si Noval nagkanayon nga nagtukma ang mga paghulagway sa mga trabahante sa duha ka mga gasulinahan ngadto sa ilang nakita sa CCTV video sa pagtulis sa tindahan pasado alas 7 sa gabie.
Saysay ni Noval nga base sa CCTV video, ilang nakita nga ang duha ka mga tulisan nga sakay sa itom nga motorsiklo naglingkod- lingkod sa tupad nga tindahan sa Remee’s General Merchandise.