GISUGDAN niadtong Dominggo ang 150 ka adlaw nga election period uban ang gun ban, ingon man ang pagpasuspenso sa mga piniling opisyal ug pagpabalhin sa mga kawani sa gobiyerno nga civil service eligibility.

Tungod niini, makabuwelyo na pod ang mga kandidato sa ilang pangampaniya ug hingusgan usab sa kapolisan ug mga sakop sa Armadong Kusog sa Pilipinas ang ilang kampaniya sa peace and order sa nasod.

Ang pangutana mao nga magmalinawon ba kaha ang umaabot nga eleksiyon karong Mayo? Samtang nagsingabot na ang eleksyon daghan naman gani kinabuhi ang nangakalas samtang nagpabiling delikado ang ubang dapit tungod sa presensiya sa mga armadong mga tawo.

Ang ulahing ihap sa awtoridad, dunay 170 ka mga private armies sa tibuok nasod ug kapin sa 500 ka mga munisipyo ug siyudad ang gitumbok karon nga 'areas of concern' - nagpasabot gikinahanglan ang higpit nga seguridad sa maong dapit.

Sa 170 ka mga private armies, ang 68 niini nagbasi kasagaran sa Automous Region in Muslim Mindanao. Makalilisang!

Pila na ka mga presidenti ang milingkod sa Malacanang apan walay nahitabo sa kampaniya pagpuhag sa mga pribadong sundalo nga gitiner sa mga politiko, dagkong negusyanti, mga bandido ug mga sindikato.

Gihimo kining mga pribadong sundalo pagpanulis, pagprotiher sa mga payuhot nga illegal nga butang, pagpanghasi ug pagpang-ambush labi na panahon sa eleksyon, ug sa bisan unsang illegal nga kalihukan.

Nganong milambo kining pribadong mga sundalo? Asa ba gikan ang ilang armas, asa gikan ang kuwarta nga gisweldo sa mga pribadong sundalo?

Ang pagkabisto sa kwesiyonabling mga kalihukan sa pamilyang Ampatuan sa Maguindanao province, sama sa pagtiner ug pribadong mga sundalo, mga armas ug bala, maoy maghatag nato og barometro kon unsa ka dali o ka paspas ang gobiyerno unya sa ilang pagbungkag niining grupo sa mga armadong mga tawo.

Sa laktod, bisan nangadakpan ug nakiha na ang mga pangulo ug lider, nagpabilin pa gihapon ang ilang mga pribadong sundalo.

Gitukod ni Presidenti Arroyo ang Zenarosa Commission nga dunay tahas pagpuhag niining mga private armies.

Mahimo pa kaha sa maong commission ang pagbugkag niining mga pribadong mga sundalo? Wala pa kaha masayod ang administrasyon ni Arroyo sa pagpili sa maong paagi?