HUGOT nga mipasidan-an ang mga nagpasiugda sa Sinulog nga di sagulan og pamulitika ang pagpahigayon sa Grand Parade karong Dominggo.
Buot ipasabot nga did-an ang mga pulitiko, ilabi na kadtong nga magpapili sa umaabot eleksiyon, sa pagkampanya atol sa Sinulog.
Kini aron pagprotehir sa relihiyuso ug kaligdong ning pagselebrar sa Piyesta Senyor.
Ang mga dibotos nga nagagikan sa bisan asa nga dapit, mopunsisok sa Basilica Sto. Nino aron sa pag-ampo ug ingon man sa pagsaksi sa mabulokon nga selebrasyon. Midayeg ug saludo kita ning panawagan sa mga nagpasiugda kay lagi, sama sa uban, di usab kita gusto nga mamansahan og pamulitika ang selebrasyon.
Apan makapugong ba gyud kaha ang mga organizers kon dunay inilang pulitiko nga motambong usab sa selebrasyon?
Mabadlong ba kaha nila kon ang pulitiko mosakay sa float ug mowarawara sa iyang mga kamot nga susama ra gihapon og nangumpaniya? Unsaon man nila pagpakgang kon kini manglamano sa mga tawo?
Siguro ang gipasabot sa mga organizers nga dili nila tugotan ang mga political streamers nga iladlad sa rota diin moagi ang Grand Parade.
Did-an usab sila sa pagpanghatag og mga political flyers, leaflets o bisan unsa nga adunay marka sa ngalan sa pulitiko, sama sa tsaliko nga gipangsul-ob sa mga barangay tanod nga nagbantay sa sports complex nga adunay ngalan sa bukobuko sa usa ka pulitiko nga magpapili sa umaabot eleksiyon. Way mamulitika, ha?