Tungod sa damgo(2)
Ms. Mysterious,
Daghan kaayong salamat sa imong suwat. Nia na gyud ang akong tubag sa imong pangutana kalabot sa imong pagsigeg damgo.
Di ko tighubad og damgo kay di man ko expert ini. Ako lang sab ning teyoriya base sab sa akong mga nahibaw-ang gamay sa psychological aspect sa damgo.
Sa imong suwat niingon kang dunay mga butang nga wa ninyo mahisguti ni Manoy, sama sa iyang pagbaton og kapuyo samtang uyab pa mo niadtong higayuna.
Hinayhinay rang nausab ang inyong pagtinagdanay samtang wa gyud ka makaako sa pagpangutana kaniya.
Duha ang way closure. Una, ang kabahin sa iyang kapuyo samtang uyab pa mong duha. Ang ikaduha mao ang inyong relasyon nga naputol samtang nagka way ayo ang dagan sa inyong komunikasyon.
Wa mo magkabuwag nga pormal o giputol ang inyong relasyon.
Bisan tuod kon naminyo ka na ug niingon kang naka move on sa imong kinabuhi, deep inside sa imong subconscious mind duna pay mga isyu nga wa ma-settle kay lagi, wa may closure. Wa ka mangutana kon tinuod bang duna siyay kapuyo ug wa mo magbuwag.
Nagbaton lang mog tagsa-tagsa ka kinabuhi nga way gitapos.
Sa akong tan-aw, mao ni ang mga stimulus sa imong kanunay nga pagdamgo. Di tungod sa pagsigeg hisgot ug paghuna-huna kaniya.
Kini man gung atong huna-huna, kon matug na ta, magsige gihapon nig andar gamit ang images sa atoang conscious o awake nga state.
Apan di na lang ko mohisgot og taas kabahin sa damgo nimo aron diretso na ta sa ikaduha mong pangutana. Mas maayo pang mag-estorya mong duha kon mobalik ka na diri sa Cebu aron duna nay closure ang inyong relasyon ug magpadayon mo sa inyong tagsa-tagsa ka kinabuhi. Makaayo kini kanimo.
Hinuon pahimangnoan ta lang ka nga posibleng mahitabo sab ang spontaneous recovery. Kana bang giingon nato nga mabanhaw ang usa ka feeling—kaguol, kamingaw ug gugma—kon dunay maka-trigger ini.Sa gugma, ang panagkita sa kanhi manag-uyab nga wa na magkita sud sa dugay nang panahon usa sa mga maka-trigger ini.
Mao nang giingon nga dunay mabanhaw nga pagbati. Unless nga prepared ka, ayaw lang kaha tingali una. Andama una ang imong kaugalingon o i-condition ang imong mind nga wa na gyud mo.
Kamong duha duna nay tagsa ka kinabuhi ug nga ang kagahapon tipik na lang sa handumanan nga nagbilin og mga pagtulun-an.
NOY KULAS
PS. Bisan tuod kon lisod kaayo namo ang milabay nga holidays, apan malampuson ang unang community outreach sa Hugs.
Di lang ko gustong mohisgot kay nihangyo ang among giadto not to talk about it, but puy-anan sa malnourished nga mga bata ang among giduaw. Pwerteng lipaya sa mga bata sa gamay namong giandam.
Di to maoy last, but maoy sinugdanan. We did it in memory of our children who are now in heaven enjoying the garden of God He prepared for us.