TIBUOK unang distrito sa lalawigan sa Sugbo nipadayag na og solidong suporta ngadto kang Sen. Manny Villar, ang kandidato pagka-presidente sa Nacionalista Party.
Kini human usab gilagdaan kagahapon sa udto ang covenant of alliance tali sa NP ug sa local nga partidong Alayon ni Cong. Eduardo Gullas nga gipahigayon sa gym sa University of the Visayas.
Sa ilang pakig-alayon, nipadayag og pagsuporta ang mga mayor sa tulo ka mga siyudad nga mao ang Talisay, Naga ug Carcar ug tulo ka mga lungsod nga mao ang Minglanilla, San Fernando ug Sibonga ngadto sa tanang mga kandidato sa NP.
Ang unom ka mga mayor nga sila si Mayor Socrates Fernandez (Talisay), Mayor Eduardo Selma (Minglanilla), Valdemar Chiong (Naga), Neneth Reluya (San Fernando), Patrick Barcenas (Carcar) ug Leonil Bacaltos (Sibonga), nitunga gyud sa kalihukan kagahapon uban pa ang ilang tibuok konseho ug mga barangay kapitan.
Samtang ang NP nipasalig usab nga ang mga kandidato sa Alayon maoy ilang mga local nga kandidato sa unang distrito nga ilang hatagan sa ilang hinabang.
Parehong nipadayag og kalipay sila si Villar ug Gullas sa ilang gihimong koalisyon kay pareho silang makabenepisyo niini aron pagsiguro sa ilang kadaugan.
“Akong ikapaniguro nga all-out gyud ang support sa mga leader ngadto na sa 130 ka mga barangay kapitan,” pasalig pa ni Gullas.
Gikalipay usab kini ni Villar ug sa tibuok niyang slate ilabina na usab kay wa nila makuha ang suporta ni Gov. Gwen Garcia, kinsa nipadayag na sa pagpaluyo sa kandidato sa administrasyon nga si Gilbert Teodoro.
Malaumon si Villar nga duna pay laing mga local nga opisyal ang mosuporta sa ilang partido.
Hinuon ang mga sakop sa Alayon nga kaalyado usab sa One Cebu Party sa gobernador magpabiling mosuporta kang Garcia.
Gikalipay usab sa mga kapitan nga nitambong sa kalihukan kagahapon ang pamahayag sa mga senatoriable sa NP nga si Gwen Pimentel, anak ug chief of staff ni Sen. Nene Pimentel nga ilang gipanghingusgan ang amendment sa local government code.
Apil sa ilang giduso nga amendment mao ang pag-increase sa IRA share gikan sa 60-40 nga bahin, himuon na gyud kining 50-50 alang sa nasudnon ug local nga kagamhanan,ug paghimong regular govern-ment employee sa tanang mga barangay kapitan aron usab ilang makuha ang mga benepisyo nga ihatag sa mga kawani sa gobyerno.(CPL)